सिभिलमा भेरोसेल खोपको दोस्रो डोज लगाउनेको भिड

२२ असार, काठमाडौं । काठमाडौंको सिभिल अस्पतालमा कोभिड– १९ विरुद्धको भेरोसेल खोपको दोस्रो डोज लगाउनेको भिड लागेको छ । भेरोसेल खोपको पहिलो मात्रा लगाएका ६० देखि ६४ वर्ष उमेर समूहका नागरिकलाई आजदेखि दोस्रो मात्रा लगाउन सुरु गरिएको हो ।

जेठ २५ देखि २९ गतेसम्म पहिलो मात्रा लगाएका नागरिकलाई आजदेखि दोस्रो मात्रा दिन थालिएको स्वास्थ्य तथा जनसंख्या मन्त्रालयले जनाएको छ। जेठ २५ देखि २९ सम्म ३ लाख ७० हजारभन्दा बढी व्यक्तिले खोपको पहिलो मात्रा लगाएका थिए।

काठमाडौंका ३२ केन्द्रबाट असार २२ गतेदेखि २४ गतेसम्म खोप दिइने छ। खोप लगाउन जानेहरूले पहिलो मात्रा लगाएको कार्ड अनिवार्य साथमा लगेर नजिकैको केन्द्रमा जान सक्नेछन्।

बुधबारदेखि यही असार २४ गतेसम्म दोस्रो मात्रा लगाउनका लागि १२ स्थान तय गरेको हो । खोप केन्द्रहरुमा वीर अस्पताल, त्रिवि शिक्षण अस्पताल, निजामती कर्मचारी अस्पताल, शुक्रराज ट्रपिकल तथा सरुवा रोग अस्पताल, परोपकार प्रसूति तथा स्त्रीरोग अस्पताल, नेपाल प्रहरी अस्पताल, वीरेन्द्र सैनिक अस्पताल, शङ्करमपुर अस्पताल, हिमाल अस्पताल, ओम अस्पताल एवं रिसर्ज सेन्टर, क्षेत्रपाटी निःशुल्क चिकित्सालय र जनमैत्री अस्पताल बालाजु रहेको काठमाडौँ महानगरपालिकाले जनाएको छ ।