आठ लाख डोज खोप काठमाडौं आइपुग्याे

२५ असार, काठमाडौं । भेरोसेलको आठ लाख डोज खोप चीनबाट काठमाडौं आइपुगेको छ । नेपाल एयरलाइन्सको वाइडबडी जहाजबाट शुक्रबार बिहान भेरोसेलको आठ लाख डोज ल्याइएको हो ।

नेपाल सरकारले चीनको सिनोफार्म कम्पनीसँग ४० लाख मात्रा खोप खरिदको सम्झौता गरेको थियो । सोही सम्झौता अनुसार पहिलो लटमा ८ लाख डोज खोप लिइएको बताइएको छ ।

खोप लिन बिहीबार चालक दलका १२ सदस्यसहित बेइजिङ उडेको वाइडबडी शुक्रबार बिहान सवा ६ बजे त्रिभुवन अन्तर्राष्ट्रिय विमानस्थलमा अवतरण गरेको हो । भेरोसेलको  बाँकी खोप थप उडानमार्फत् ल्याइने स्वास्थ्य सेवा विभागले जनाएकाे छ ।

पहिलो खेप खोप ल्याउन वाइडबडी जहाज बिहीबार साँझ चीनको राजधानी बेइजिङ गएको थियो । साउन ८ गतेसम्म तीनवटा उडानमार्फत खोप नेपाल ल्याइने स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार यो खोप ६० वर्ष मुनि उमेर समूहकालाई लगाउने  तयारी छ ।