नबिल बैंकले यूनाईटेड फाइनान्सलाई प्राप्ति गरी आजदेखि एकीकृत कारोबार शुभारम्भ

२७ असार, काठमाडौं । नबिल बैंकले युनाइटेड फाइनान्सलाई एक्विजेशन (प्राप्ति) गर्ने प्रक्रिया पूरा गरेको छ । प्राप्ति
प्रक्रिया पूरा भएर आजदेखि एकीकृत कारोबार सुरु भएको हो ।

आज आयोजित एक कार्यक्रममा नबिल बैंक तथा युनाइटेड फाइनान्सका अध्यक्ष उपेन्द्रप्रसाद पौड्याल र
बसन्तकुमार चौधरीले एकीकृत कारोबार शुभारम्भ गरेका छन् ।

नबिल बैंकका अध्यक्ष उपेन्द्र पौड्यालले सरकार तथा नेपाल राष्ट्र बैंकको नीतिगत व्यवस्थालाई अंगिकार
गरी मर्जर तथा प्राप्ति प्रक्रियामा बैंक अगाडि बढेको बताए । ‘यो प्राप्तिले नबिल बैंकको आगामी व्यवसायिक
क्रियाकलाप एवं देशको समग्र वित्तीय क्षेत्रको गतिविधिमा समेत विशेष योगदान पुग्ने कुरामा हामी विश्वस्त
रहेका छौं,’ अध्यक्ष पौड्यालले भने ।

युनाइटेड फाइनान्सलाई प्राप्ति पश्चात नबिल बैंकको चुक्ता पुँजी रु. १३ अरब ८४ करोड पुगेको छ भने कुल
पुँजीकोष रु ३२ अर्ब ६८ करोड हुनेछ । साथै, नबिल बैंकको शाखा सञ्जालमा बृिद्ध भई १३५ पुगेको छ तथा एटीएम संख्या
भने १८३ हुनेछ । निक्षेपको आकार रु २१६ अर्ब हुनेछ भने कर्जाको आकार रु २०१ अर्ब हुनेछ (चैत्र मसान्तको
बित्तिय विवरण अनुसार) । यसले गर्दा नबिल बैंकको कर्जा एवं निक्षेप दुवैको आकार २ खर्ब माथि हुनेछ । यो
प्राप्तिसँगै नबिल बैंकले बजारमा आफ्नो नविन सेवा र थप शाखा सञ्जालमार्फत नयाँ रणनीति अनुसार
बजारमा उपस्थित हुनेछ ।