राष्ट्रपतिद्धारा देउवालाई प्रधानमन्त्रीमा नियूक्त, शपथग्रहण साँझ ६ बजे

२९ असार, काठमाडौं । राष्ट्रपति बिद्यादेवी भण्डारीले नेपाली कांग्रेसका सभापति एवं संसदीय दलका नेता शेरबहादुर देउवालाई प्रधानमन्त्रीमा नियूक्त गरेकी छन् ।

संविधानको धारा ७५ (५) अनुसार देउवा प्रधानमन्त्रीमा नियूक्त भएका हुन् । उनले अब ३० दिनभित्र संसदबाट विश्वासको मत लिनुपर्ने हुन्छ ।

विपक्षी गठबन्धनको तर्फबाट प्रधानमन्त्रीमा नियूक्त कांग्रेस सभापति देउवालाई माओवादी केन्द्र, जसपा र एमालेकै २३ जना सांसदले संविधानको धारा ७६(५) बमोजिम प्रधानमन्त्री बनाउन हस्ताक्षर गर्दै राष्ट्रपतिलाई १४९ जनाको हस्ताक्षर बुझाएका थिए ।

तर राष्ट्रपतिले सो हस्ताक्षरलाई मान्यता नदिई प्रधानमन्त्री केपी ओलीको सिफारिसमा संसद बिघटन गरी मध्यावधि चुनावको घोषणा गरेपछि विपक्षी गठबन्धनका १४६ जना सांसदहरुले हस्ताक्षरसहित परमादेशको माग गर्दै सर्वोच्च अदालत गएका थिए ।

सोही बमोजिम अदालतले देउवालाई आज साँझ ५ बजेसम्म प्रधानमन्त्रीमा नियूक्त गरी ७ दिनभित्र संसद बैठक बोलाउन आदेश जारी गरेको थियो ।

शपथग्रहण साँझ ६ बजेका लागि तोकिएको छ । देउवा योसहित गरी पाँचौ पटक प्रधानमन्त्रीमा नियूक्त हुने संम्भवत पहिलो नेपाली राजनीतिज्ञ बनेका छन् ।