बीरगञ्जमा नेपाल प्रहरी र सशस्त्र प्रहरीको साँठगाँठमा तस्करी फस्टायो

२९ असार, बीरगञ्ज । छिमेकी राष्ट्र भारतसँग सीमा जोडिएका नाकाहरुबाट नेपाल प्रहरी र सशस्त्र प्रहरीकै संलग्नतामा तस्करी भइरहेको छ । भारतबाट अबैध रुपमा समान ल्याउने र नेपालबाट अबैध रुपमा निकासी हुने मालसमानमा नेपाल प्रहरी र सशस्त्र प्रहरीकै साँठगाँठ हुने गरेको हो ।

तस्करहरुले नेपालबाट मदिरा र भारतबाट कस्मेटिक समान, तेल, चिनी ,कपडा ,हाडवेयर र बिजुलीका समान नेपाल भित्र्याउने गरेको स्थानीयले बताएका छ्न् । तर सेटिङ्गमा आएको समानको कुनै जाँच भने हुँदैन । पछिल्लो समय प्रहरीकै संलग्नतामा खुला सीमानामा तस्करी भएको स्थानीयले बताएका छन् ।

स्थानीयहरुका अनुसार जिल्लाको पश्चिमी नाका भिस्वा, प्रसौनी भाठा, झौवा, भलूवाहा, दसावता , जानकीटोला , पाण्डेपुर, पिडारीगुठी, महादेवपटी, सुबर्णपुर ,माली शकरसरैया लगायतका नाकाहरुबाट दिनहुँ मदिरा तस्करी भइरहेको छ । अबैध समान भारतबाट पठाउनका लागि अथवा भारतबाट नेपाल भित्र्याउनका लागि सादा पोसाकमा खटिएका प्रहरीले तस्करसँग सेटिङ्ग मिलाउने काम गरेका छन् ।

बिशेषगरी प्रसौनी भाठा, भिस्वा, जानकीटोला नाकाबाट कपडा ,सुर्ती ,र बिजुली, हार्डवयर, मोटरपार्ट्स ,किराना आइटमको समान भित्र्याउन नेपाल प्रहरी र सशस्त्र प्रहरीसँग सेटिङ्ग मिलेको स्थानीयहरुको दाबी छ । ती नाकाहरुबाट रातिको समयमा तस्करहरुले मालसमान दुवानी गर्ने स्थानीयले बताएका छ्न् ।