नर्वेमा जेएसएस रनिङ कप भलिबल प्रतियोगिता सम्पन्न

३१ असार, ओस्लो । नर्वेको राजधानी ओस्लो शहरको अति नै रमणीय स्थल सोङ्स्भानमा गत आइतबार छैँटौ जेएसएस रनिङ कप भलिबल टुर्नामेन्ट सम्पन्न भएको छ ।

खेलकुदको माध्यामद्वारा नर्वेका विभिन्न स्थानमा शिक्षा, रोजगारी एवं अन्य व्यवसाय गरी बसोबास गरिरहेका नेपाली भाषीहरु माझ भाईचारा र आपसी सद्भाव बढाई नर्वेको नेपाली समाजमा छुट्टै पहिचान बनाउने र नेपाली समाज बीचको सम्बन्धलाई अझै बढी प्रगाढ र मजबुत बनाउने प्रमुख उद्देश्यका साथ यो रनिङ कप टुर्नामेण्ट वार्षिक रुपमा आयोजना गरिदैं आएको जेएसएस नर्वेका वरिष्ठ उपसभापति कबिन्द्र ढकालले जानकारी दिए ।

नर्वेमा रहेका विभिन्न संघसंंस्था तथा समुहबाट पुरुषतर्फ ९ टीम सहभागी रहेका थिए भने महिलातर्फ २ टीम सहभागी रहेका थिए । पुरुषतर्फ नेपाली पोर्तुगिष समाज नर्वे, एनआरएनए नर्वे, ओएनयुएफ नर्वे, एभरेष्ट क्लब, रेगुलर एथ्लेटिक्स ग्रुप अफ स्टुडेन्टस ओस्लो, नेपलीज सोसाईटी इन ट्रोम्सो, नेप्लिज स्टुडेन्ट सोसाईटी इन ओस्लो, जेएसएस नर्वे ए र जेएसएस नर्वे बी सहभागी भएका थिए भने महिलातर्फ जेएसएस नर्वे ए र जेएसएस नर्वे बी टीमले सहभागिता जनाएका थिए ।

आइतबार रातिसम्म भएको खेलमा नर्वेमा रहेका विभिन्न संघसंस्था तथा समुहबाट पुरुषतर्फ ९ टीम सहभागी रहेका थिए भने महिलातर्फ २ टीम सहभागी रहेका थिए । खेलमा जित हासिल गर्नेलाई पुरुषतर्फको टीमलाई ६ हजार क्रोनर (नेपाली करिब ८३ हजार रुपैयाँ) नगद पुरस्कारको साथै मेडल, रनिंङ कप र प्रमाण पत्र प्रदान गरिएको छ । दोस्रो हुने टीमलाई पनि ३ हजार क्रोनर (करिब ४२ हजार नेपाली रुपैयाँ) र मेडल, प्रमाणपत्र प्रदान गरिएको छ ।

त्यसैगरी महिलातर्फ पहिलो हुने टीमलाई तीन हजार क्रोनर (करिब नेपाली ४२ हजार रुपैयाँ),कप, प्रमाणपत्र, मेडल र दोस्रो हुनेलाई १५ सय क्रोनर (करिब २१ हजार नेपाली रुपैयाँ) र प्रमाणपत्र, मेडल प्रदान गरिएको जेएसएसले जनाएको छ । छैँटौ जेएसएस रनिंङ कप भलिबल टुर्नामेन्टका संयोजक आबिश्कार बास्तोलाले जानकारी दिए । पुरुषतर्फ नेपाली पोर्तुगिस समाज नर्वे बिजेता रह्यो भने आयोजक टीम जेएसएस ‘ए’ उपबिजेता बन्न सफल भयो ।

त्यसैगरी महिलातर्फ जेएसएस ए प्रथम भयो भने जेएसएस बी उपबिजेता बन्न सफल भयो। पुरुषतर्फका उत्कृष्ट खेलाडी जेएसएस ‘ए’ का जीवनाथ भट्टराई भए भने महिलातर्फ जेएसएस ‘ए’ की चन्द्रा चन्द उत्कृष्ट खेलाडी भईन । प्रतियोगिताका उत्कृष्ट खेलाडीहरुलाई नगद पुरस्कार, मेडल र प्रमाण पत्र प्रदान गरिएको थियो । साथै, साना बावुनानीहरुका लागि पनि उमेर समुह अनुसारका खेल प्रतियोगिता गराइएको थियो ।

जेएसएस नर्वेले गत ६ वर्षदेखि निरन्तर रुपमा यस खेलको आयोजना गर्दै आएको छ । जेएसएस नर्वेका सभापति जितेन्द्र बिक्रम शाहीले जानकारी दिए । आइतबार सम्पन्न उक्त खेलमा नर्वेमा बसोवास गर्ने पाँच सय बढी नेपालीहरुको उपस्थित रहेको आयोजकले जानकारी दिएको छ।