नेपाल पुनर्बीमा कम्पनीले गर्यो ९२ करोड ५७ लाख मुनाफा, प्रतिशेयर आम्दानी कति ?

काठमाडौं । नेपाल पुनर्बीमा कम्पनी तेस्रो त्रैमासको वित्तीय विवरण सार्वजनिक गरेको छ । उक्त विवरण अनुसार तेस्रो त्रैमाससम्ममा कम्पनीले ९२ करोड ५७ लाख रुपैयाँ मुनाफा कमाएको छ।

कम्पनीले निर्जीवन बीमा व्यवसाय ८२ करोड ४७ लाख र जीवन बीमा व्यवसाय १० करोड १० लाख रुपैयाँ गरी सो बराबरको मुनाफा आर्जन गरेको हो।

कम्पनीको अघिल्लो आर्थिक वर्षको यसै अवधिको तुलनामा मुनाफा १.०५ प्रतिशत अर्थात ९६ लाख ४० हजार रुपैयाँ बढी हो। अघिल्लो आर्थिक वर्षको सोही अवधिसम्ममा कम्पनीले जीवन र निर्जीवन बीमा व्यवसायबाट ९१ करोड ६१ लाख रुपैयाँ मुनाफा आर्जन गरेको थियो।

यसैगरी, कम्पनीले गत आर्थिक वर्षको तेस्रो त्रैमाससम्ममा ५ अर्ब ९२ करोड ५६ लाख रुपैयाँ बीमाशुल्क आर्जन गरेको छ। कम्पनीले निर्जीवन व्यवसायबाट ५ अर्ब २२ करोड ६१ लाख रुपैयाँ र जीवन बीमा व्यवसायबाट ६९ करोड ९५ लाख रुपैयाँ गरी सो बराबरको बीमाशुल्क आर्जन गरेको हो।

चुक्ता पूँजी १० अर्ब रुपैयाँ रहेको कम्पनीको जगेडा कोषमा ३ अर्ब ३६ करोड ९८ लाख रुपैयाँ र बीमा कोषमा २ अर्ब ३ करोड ५३ लाख रुपैयाँ सञ्चित छ।

कम्पनीको प्रतिशेयर आम्दानी वार्षिक १२ रुपैयाँ ३४ पैसा, प्रतिशेयर नेटवर्थ १५४ रुपैयाँ ५ पैसा र मूल्य आम्दानी अनुपात ६८.७० गुणा छ।