प्रधानमन्त्री देउवालाई चिनियाँ राजदूत होउ यान्छीले दिइन् बधाई, थप १६ लाख खोप अनुदान दिने

१ साउन, काठमाडौं । नेपालका लागि चिनियाँ राजदूत होउ यान्छीले नवनियुक्त प्रधानमन्त्री शेरबहादुर देउवालाई भेटेरै बधाई दिएकी छन् । यान्छीले प्रधानमन्त्री निवास बालुवाटारमा पुगेर शुभकामना तथा बधाई दिएकी हुन् ।

प्रधानमन्त्री देउवासँग बालुवाटारमा भएको भेटवार्तामा राजदूत यान्छीले चीन सरकार सँधै नेपालसँग हातेमालो गरेर अगाडि बढ्ने प्रतिबद्धता जनाएकी छन् भने अबको दिनमा नेपाल र नेपालीसँग अझै प्रगाढ सम्बन्ध रहने विश्वास व्यक्त गरिन् । साथै चीनले नेपाललाई थप १६ लाख कोरोना विरुद्धको खोप अनुदानमा उपलब्ध गराउने जानकारी दिएकी छन् ।

जवाफमा प्रधानमन्त्री देउवाले आफू सधैं चीनसँग बलियो सम्बन्ध स्थापना गर्न चाहेको भन्दै चीन सरकारले नेपाललाई कोरोना विरुद्ध गरेको सहायताप्रति धन्यवाद प्रकट गरेका छन् ।

यसअघि चीनबाट अनुदानमार्फत १८ लाख डोज कोरोना खोप आइसकेको छ भने सरकारले थप ४० लाख डोज खोप खरिदका लागि सम्झौता गरेको छ । जसअन्तर्गत आठ लाख डोज खोप आइसकेको छ ।

प्रधानमन्त्री देउवाले राजदूत यान्छीले सँगको भेटलाई पुष्टि गर्दै आफ्नो ट्विटमा फोटोसमेत सार्वजनिक गरेका छन् ।