काठमाडौंमा मौज्दात सकिएको भन्दै कोरोनाविरुद्धको खोप कार्यक्रम स्थगित

१ साउन, काठमाडौं । काठमाडौं जिल्लामा कोरोनाविरुद्धको खोप अभियान स्थगित गरिएको छ । कोरोनाविरुद्धको भेरोसेल खोप असार २९ गतेदेखि साउन २ गतेसम्म सञ्चालन गर्ने भनिएपनि मौज्दात सकिएको भन्दै खोप अभियान स्थगित गरिएको हो ।

जिल्ला स्वास्थ्य कार्यालय काठमाडौंले आज एक सूचना जारी गर्दै साउन २ गतेसम्म सञ्चालन गर्ने भनिएको खोप अभियान स्थगित गरिएको जनाएको छ ।

अर्को सूचना जारी नभएसम्मका लागि भेरोसेल खोप पहिलो मात्रा लगाउने कार्यक्रम स्थगित भएको प्रमुख जनस्वास्थ्य प्रशासक बद्री बहादुर खड्काले जारी गरेको सूचनामा उल्लेख छ ।

मन्त्रीस्तरीय निर्णयबाट ५५ बर्ष देखि माथिका सबै व्यक्तिलाई भेरोसेल खोपको पहिलो मात्रा दिने निर्णय भएको थियो । यो खोप विश्वविद्यालयका प्राध्यापक, विद्यालयका शिक्षक तथा कर्मचारी, सार्वजनिक यातायातमा कार्यरत चालक तथा सहचालकहरुलाई समेत यसैपटक भेरोसेल खोप दिने र अत्यावश्यक सेवामा संलग्न हुनेहरु र खोप अनिवार्य गरेका देशमा जाने नेपाली नागरिकलाई लगाइदिने निर्णय भएको थियो ।