प्रधानमन्त्री देउवाले आजै संसदबाट विश्वासको मत लिने

३ साउन काठमाडौं । प्रधानमन्त्री शेरबहादुर देउवाले आजै बस्ने संसदबाट विश्वासको मत लिने भएका छन् । सर्वोच्च अदालतको परमादेशअनुसार संविधानको धारा ७६(५) अनुसार प्रधानमन्त्री नियुक्त भएका देउवाले आजै विश्वासको मत लिने भएका हुन् ।

प्रधानमन्त्री नियुक्त भएपछि ३० दिनभित्र संसदबाट विश्वासको मत लिनुपर्ने संवैधानिक व्यवस्था भएपनि संसद बैठक सुरु भएकै दिन देउवाले विश्वासको मत लिएर राजनीतिक रुपमा बलियो बन्ने संकेत गरेका हुन् । विघटित प्रतिनिधिसभालाई सर्वोच्च अदालतले २८ असारमा पुनर्स्थापना गरेपछि आज संसद बैठक बोलाइएको छ ।

देउवाले प्रधानमन्त्रीमा नियुक्त भएपछि विश्वासको मत लिन हतार नगर्ने प्रतिक्रिया दिंदै आएपनि नेकपा एमाले र जनता समाजवादी पार्टी (जसपा)मा देखिएको चरम विवादले समस्या पार्न सक्ने देखिएको भन्दै संसद सुचारु भएकै दिन विश्वासको मत लिन लागिएको कांग्रेसका नेताहरुको भनाई छ ।

एमालेमा अध्यक्ष केपी शर्मा ओली पक्षले स्थायी कमिटी बैठक राखेर विश्वासको मत नदिन सांसदहरुलाई निर्देशन दिइसकेको छ । यस्तो अवस्थामा माधवकुमार पक्षबाट भने कुनै प्रतिक्रिया आएको छैन । देउवा सरकारलाई बहुमत प्राप्त गर्न संसदमा १३६ विश्वासको मत चाहिन्छ । स्रोतका अनुसार एमालेमा नेपाल पक्षबाट देउवालाई विश्वासको मत प्राप्त हुने छ भने महत्वपूर्ण मन्त्रालयको पनि जिम्मेवारी दिने तयारी भइरहेको छ ।

देउवालाई आफ्नै पार्टीको ६१, माओवादी केन्द्रका ४९, जसपाको उपेन्द्र यादव पक्षका १७ र राष्ट्रिय जनमोर्चाका एक सांसदको साथ रहेको छ । यी सबै मतको अधारमा देउवालाई बहुमतका लागि आवश्यक पर्ने १३६ मतमा ८ मत पुग्दैन । यो ८ मतको लागि एमालेको नेपाल पक्षीय नेताहरुले साथ दिनेमा देउवा ढुक्क देखिएका छन् । प्रतिनिधिसभा विघटन भएपछि संसद पुनर्स्थापना र देउवालाई प्रधानमन्त्री नियुक्त गर्न माग गर्दै सर्वोच्च गएका १४६ सांसदमा एमालेको नेपाल पक्षिय २३ जना सांसद सहभागि थिए ।

संसद पुनर्स्थापना गर्दै देउवालाई प्रधानमन्त्री नियुक्त गर्न परमादेश दिएको सर्वोच्चले धारा ७६(५) को प्रधानमन्त्रीका लागि समर्थन गर्दा वा विश्वासको मत दिँदा ह्वीप नलाग्ने र दल त्याग ऐनअनुसार कारबाही गर्न नमिल्ने फैसला गरेपछि नेपाल पक्षीय सांसदहरुलाई देउवाको पक्षमा विश्वासको मत दिन बाटो खुलेको छ ।