एमाले स्थायी कमिटीमा विवाद चर्कियोः नेपाल पक्ष अनुपस्थित

३ साउन, काठमाडौं । प्रमुख प्रतिपक्षी दल नेकपा एमालेले आजका लागि बोलाएको स्थायी कमिटी बैठकमा माधवकुमार नेपाल पक्ष सहभागी छैन ।

ललितपुरको च्यासलस्थित तुलसीलाल प्रतिष्ठानमा जारी बैठकले भोली बस्ने केन्द्रीय कमिटी बैठकको अजेण्डा तय गर्ने भएको छ । आजको बैठक पनि स्थगित गर्न माधव नेपाल पक्षले आग्रह गरेकोमा ओलीले अस्वीकार गरेका छन् ।

प्रधानमन्त्री शेरबहादुर देउवाले आजकै प्रतिनिधिसभा बैठकबाट विश्वासको मत लिने तयारी गरिरहेका बेला एमालेमा विवाद थप चर्किएको छ ।एमाले संसदीय दलले देउवालाई विश्वासको मत नदिने निर्णय गरेको छ भने नेपाल पक्षले प्रतिनिधिसभा जोगाउनकै लागि भएपनि देउवालाई विश्वासको मत दिने निर्णय गरेको छ ।

आजको बैठकमा पनि नेता बामदेव गौतम सहभागी छैनन् । अस्ती शुक्रबार पनि गौतमले बैठक बहिष्कार गरेका थिए ।