आजदेखि अमेरिकी खोपको पहिलो डोज लगाइँदै

४ साउन, काठमाडौं । कोरोना भाइरसविरुद्धको खोप अभियानअन्तर्गत आज साउन ४ गते सोमबारदेखि अमेरिकाले अनुदानमा उपलब्ध गराएको जोन्सन एण्ड जोन्सन खोप पहिलो डोज लगाइँदै छ। अमेरिकाबाट कोभ्याक्स फ्यासिलिटीमार्फत सहयोगमा आएको खोप काठमाडौं जिल्लामा आजदेखि लगाइने भएको हो।

यो खोप एक पटक मात्रै अर्थात सिंगल डोज लगाए पुग्ने छ। काठमाडौंका ४४ वटा खोप केन्द्रबाट साउन ४ देखि ६ गतेसम्म यो खोप लगाइने छ।

स्वास्थ्य मन्त्रालयका अनुसार यो खोप ५० देखि ५४ वर्ष उमेर समूहका, पहिलो खोप लगाउन बाँकी सबै तथा पूर्ण र अति अशक्त, अपाङ्गता भएका नागरिक र नेपालमा रहेका शरणार्थीलाई दिइने छ।

आज बिहान १० बजेदेखि देशका विभिन्न स्थानहरुमा खोप अभियान प्रारम्भ भएको छ । अमेरिकाबाट गत सोमबार जोन्सन एन्ड जोन्सनको १५ लाख ३४ हजार ८५० डोज खोप नेपाल आइपुगेको हो।