विधान विपरित बाँडिएका क्रियाशील सदस्यता खारेज हुनुपर्छः कांग्रेस नेता डा. कोइराला

५ साउन, काठमाडौं । पार्टीको विधान भन्दा बाहिर गएर पार्टी कब्जा गर्ने मनसायबाट मनोमानी ढंगले बाँडिएको सदस्यता कुनै पनि हालतमा स्वीकार्य नहुने नेपाली कांग्रेसका प्रभावशाली नेता डा. शेखर कोइरालाले बताएका छन् । विधान विपरित बाँडिएका क्रियाशील सदस्यता खारेज हुनुपर्ने डा. कोइरालाको भनाई छ ।

क्रियाशील सदस्यतामा भएको धाँधलीको बिरुद्ध कांग्रेस केन्द्रीय कार्यलय सानेपामा आमरण अनशनमा बसेका धनुषा, बारा र सर्लाहीका कांग्रेस नेता तथा कार्यकर्ताहरुको गुनासो सुन्न र धर्नामा ऐक्यबद्धता जनाउन नेपाली कांग्रेसका नेता डा. शेखर कोइराला आज पार्टी केन्द्रीय कार्यालय सानेपा पुगेका थिए ।

क्रियाशील सदस्यतामा भएको धाँधली बिरुद्धको यस प्रकारको लडाईमा आफु सधैं उहाँहरू सँगै रहेको र यसप्रकारको लडाईमा अन्तिमसम्म साथ दिने प्रतिबद्धता उनले पार्टी कार्यकर्ता माझ जनाएका छन् । कोइरालाले पार्टीको कुनैपनि तहमा बसेर काम गर्ने साथीहरु माथी हुने अन्याय सहेर नबस्ने बताए ।