करोडौं रुपैयाँ ह्याक गरि निकाल्ने धम्की: राष्ट्र बैंक भन्छ– बैंकिङ सिस्टम सुरक्षित छ

७ साउन, काठमाडौं । अज्ञात ह्याकरले ईमेल र भाइवरमार्फत नेपाल राष्ट्र बैंकसहित १५ बैंकका बैंकिङ सिष्टम ह्याक गर्ने चेतावनी दिएको छ । अज्ञात ह्याकरले ईमेल र भाइवरमार्फत करोडौं रुपैयाँ निकाल्ने भन्दै धम्कीपूर्ण मेसेज पठाएका छन् ।

बुधबार साँझ राष्ट्र बैंकका प्रवक्ता, सहप्रवक्ता तथा विभिन्न बैंकका उच्च अधिकारीलाई चेतावनीपूर्ण इमेल आएको राष्ट्र बैंकका अधिकारीहरुले बताएका हुन् । बुधबार साँझ इमेल आए तापनि बिहीबार बिहानै सिष्टम ह्याक गरी रकम निकाल्ने म्यासेज आएको राष्ट्र बैंकको बैंक तथा वित्तीय संस्था नियमन विभागका प्रमुख एवं प्रवक्ता देवकुमार ढकालले जानकारी दिए ।

उनका अनुसार आफूलाई ह्याकर बताउने समूहले राष्ट्र बैंकसहित १५ वाणिज्य बैंकको सिस्टम ह्याक गरी रकम निकाल्ने म्यासेज भाइबर र म्यासेन्जरमार्फत प्राप्त भएको हो । “मलाई भाइबर र म्यासेन्जरमा यस्तो म्यासेज प्राप्त भएको थियो, हामीले हाम्रो (नेपाल राष्ट्र बैंकको) र बैंकहरूको सिस्टम चेक ग¥यौँ, हाम्रो सिस्टम सुरक्षित छ, ह्याक भएको छैन, डराउनुपर्ने अवस्था छैन”, उनले भने, “यो कार्य कानूनीरूपमा दण्डनीय हो, ह्याकारहरुको खोजी गरि कारबाही हुन्छ ।”

उनका अनुसार इमेल र कल गर्ने व्यक्तिको विषयमा थप अनुसन्धान भइरहेको छ तर कसले त्यस्तो म्यासेज पठाएको भन्ने विषयमा हालसम्म केही खुलेको छैन । ह्याकरको धम्कीपछि बैंकहरु आ–आफ्नो बैकिङ सिस्टम चेक गर्न लागिपरेका छन् । बैंकमा निक्षेप राख्नेहरु भने ह्याकरको उक्त धम्कीपछि सशंकित बनेका छन् ।

कसैले धम्क्याउने प्रयोजनका लागि पनि उक्त इमेल र फोन गरेको हुनसक्ने आशंका गरिएको बैंकका अधिकारीहरु बताउँछन् । ह्याकरले पठाएको भनिएको म्यासेजमा नेपाल राष्ट्र बैंक, कुमारी बैंक, नेपाल बैंक, नबिल बैंक, राष्ट्रिय वाणिज्य बैंक, माछापुच्छ«े बैंक, एनएमबी बैंक, एनआईसी एशिया बैंक, बैंक अफ काठमाण्डू, सिटिजन्स बैंक इन्टरनेशनल, सानिमा बैंक, नेपाल एसबीआई, एभरेष्ट, नेपाल इन्भेष्टमेन्ट र हिमालय बैंकको नाम उल्लेख गरी ती बैंकको सिस्टम ह्याक गरेर रकम निकालिने बताइएको छ ।

साथै सो म्यासेजमा आफूले पठाएको सन्देशलाई हलुका रूपमा नलिन ह्याकरले चेतावनी पनि दिएको छ । बिगतमा पनि नेपाली बैंकहरुबाट करोडौं रुपैयाँ चाईनिज तथा अफ्रिकन ह्याकरहरुले निकाली सकेका छन् ।