राणा डीआईजी र गुरुङलाई एसएसपीमा बढुवा गर्न सिफारिस

७ साउन, काठमाडौं । सहकुल थापाको एआईजीमा बढुवापछि रिक्त रहेको एकमात्र डीआईजी पदमा प्रहरी वरिष्ठ उपरीक्षक सौरभ राणालाई बढुवा गर्नका लागि सिफारिस गरिएको छ । राणा हाल गौतमबुद्ध अन्तर्राष्ट्रिय विमानस्थल सुरक्षा कार्यालय भैरहवामा कार्यरत छन् ।

जनपद प्रहरी समूहतर्फबाट प्रहरी नियमावली २०७१ (संशोधनसहित) को नियम २७ को उपनियम ४ को प्रावधानअनुसार सिफारिस गरिएको हो ।

राणा आईजीपी शैलेश थापा क्षेत्रीका ब्याचमेट हुन् । राणालाई संघीय प्रहरी इकाई कार्यालय धरानमा रहँदा एकजना महिलाले बलात्कार गरेको आरोप लगाएका थिइन् । सो मुद्दामा राणाले सफाई पाईसकेका छन् ।

डीआईजीका लागि एसएसपी हरिराज वाग्ले र पूजा सिंहले पनि जोडबल लगाएका थिए । एसएसपी वाग्ले गण्डकी प्रदेशका मुख्यमन्त्री कृष्णचन्द्र नेपालीका ज्वाई हुन् ।

त्यस्तै नेपाल प्रहरी अस्पताल महाराजगञ्जमा कार्यरत एसपी छायाँ देवी गुरुङलाई एसएसपीमा बढुवाका लागि सिफारिस गरिएको छ । नेपाल प्रहरीमा प्राविधिक प्रहरी समूह, स्वास्थ्य उपसमूह नर्सिङतर्फको प्रहरी वरिष्ठ उपरीक्षक पदमा प्रहरी उपरीक्षक रहेकी गुरुङलाई बढुवाका लागि सिफारिस गरिएको हो ।

प्रहरी नियमावली २०७१ (संशोधनसहित) को नियम २७ को उपनियम ४ को प्रावधानअनुसार सिफारिस गरिएको हो । त्यस्तै, नेपाली प्रहरी अस्पताल महाराजगञ्जमा कार्यरत प्रहरी नायब उपरीक्षक रामेश्वर अधिकारीलाई पनि प्रहरी उपरीक्षक पदमा बढुवाका लागि सिफारिस गरिएको सूचनामा उल्लेख छ ।