सत्ता गठबन्धनबीच मन्त्रालय भागबण्डामा सहमति, माधव पक्ष सहभागी नहुने

१४ साउन, काठमाडाैं । सरकारमा सहभागी हुन एमालेको माधव नेपाल पक्षधर २२ सांसदहरुको दवाव बढिरहँदा सत्ता गठबन्धनको आज बसेको गोप्य बैठकले मन्त्रिपरिषदलाई पूर्णता दिने निर्णय गरेको छ ।

नेपाल पक्षधरलाई सहभागी नगराईकनै अब मन्त्रिपरिषदले पूर्णता पाउने भएको हो । तर नेपाल पक्षलाई सरकारी तथा संवैधानिक नियुक्तिमा अधिकतम अवसर दिने गरी कांग्रेस, माओवादी र जनता समाजवादी पार्टीले मन्त्रालयको भागबण्डा मिलाएको बताइएको छ ।

आज बिहान बसेको शीर्ष नेताहरुको बैठकले नेपाली कांग्रेसले प्रधानमन्त्रीसहित ८, माओवादी केन्द्रलाई सात र जसपाले ५ मन्त्रालय दिने गरी प्रारम्भिक खाका तयार पारिएको कांग्रेसका एक नेताले नेपालबहसलाई बताए । कुन मन्त्रालय कसले पाउने भन्ने विषयमा समान्य छलफल भएपनि मन्त्रालयगत भागबण्डाको टुङो भने लागिसकेको छैन् ।

तर राज्यमन्त्रीमा कसलाई कति दिने भन्ने टुंगो भने लागेको छ । गठबन्धनका शीर्ष नेताहरुको गोप्य बैठकपछि कांग्रेसको पदाधिकारी बैठक बुढानिलकण्ठमा बस्दैछ । त्यस्तै जसपाको बैठक पनि आजै बस्ने भएको छ ।