अनुदानकाे ३२ लाख डोज खोप एक साताभित्रै नेपाल आउने

१७ साउन, काठमाडौं । एक साताभित्रै नेपालमा ३२ लाख डोज कोरोना खोप आउने भएको छ । चीन र जापान सरकारले अनुदानमार्फत् दिने भनेर घोषणा गरेको कोरोना खोप यसै साताभित्र नेपाल आउने भएको हो ।

आइतबार गृह मन्त्रालयमा भएको छलफलमा स्वास्थ्य राज्यमन्त्री उमेश श्रेष्ठले चीनबाट १६ लाख र जापानबाट १६ लाख खोप यही साताभित्र आउने बताए । केही समयअघि चीन र जापानले अनुदानस्वरुप नेपाललाई १६-१६ लाख डोज खोप दिने उल्लेख गरेका थिए ।

चीनले यसअघि पनि नेपाललाई दुई चरणमा १८ लाख भेरोसेल खोप अनुदानमा दिएको थियो। त्यसबाहेक सरकारले चीनसँग ४० लाख डोज खोप पनि खरिद गरिसकेको छ। सोही खोप अहिले देशभर लगाइराखिएको छ।

जापानले भने खोप पहिलोपटक दिन लागेको हो। जापानले दिन लागेको खोप एन्ट्रेजेनेकाको हो। सरकारले उक्त खोप यसअघि कोभिसिल्डको पहिलो डोज लगाएर दोस्रो डोज लगाउन बाँकी रहेकालाई लगाउने तयारी गरेको छ।