सरकारले डेढ करोड डोज खोप खरिद गर्ने

१८ साउन, काठमाडौं । सरकारले डेढ करोड डोज खोप खरिद गर्ने सम्झौता गरेको छ । वयस्क तथा किशोर किशोरीलाई लक्षित गरी कोभिड-१९ विरुद्ध १ करोड ५० लाख डोज खोपको खरिद गर्न सरकारले सम्झौता गरेको हो ।

सोमबार स्वास्थ्य मन्त्रालयमा आयोजित पत्रकार सम्मेलनमा स्वास्थ्य राज्यमन्त्री उमेश श्रेष्ठले डेढ करोड खोप आपूर्तिका लागि खरिद सम्झौता भएको बताएका छन् ।

मन्त्री श्रेष्ठका अनुसार ४० लाख डोज मोर्डना, ५० लाख जोन्सन एन्ड जोन्सन, ४० लाख फाइजर र २० लाख अस्ट्राजेनेका खोप सुनिश्चित भएको हो । साथै, मन्त्री श्रेष्ठले तेस्रो लहरलाई मध्यनजर गरी पूर्वाधारको विस्तार, जनशक्ति व्यवस्थापन, पीपीई लगायत अत्यावश्यक सामाग्रीको व्यवस्थापन समेत गरिएको छ ।

अतिरिक्त स्वास्थ्यकर्मी परिचालन गरी एन्टीजेन र पीसीआर परीक्षणलाई पनि व्यापक बनाइने राज्यमन्त्री श्रेष्ठले जनाए । चैत मसान्तसम्म सबै नेपालीलाई खोप लगाउने सरकारको योजना रहेको समेत बताए ।

कांग्रेसको घोषणापत्रमा उल्लेख भएअनुसार सबै नेपाली नागरिकको स्वास्थ्य बीमालाई सुनिश्चित गर्ने बुँदालाई कार्यान्वयन गर्ने घोषणा पनि राज्यमन्त्री श्रेष्ठले गरेका छन् ।आगामी पुस–माघसम्म ३ करोड २३ लाख डोज कोरोना खोप आइसक्ने दाबी गरेका छन् ।

यस्तै, स्वास्थ्यमन्त्री श्रेष्ठले आगामी पुस–माघसम्म ३ करोड २३ लाख डोज कोरोना खोप आइसक्ने दाबी गरेका छन् ।आफ्नो १०० दिने कार्ययोजना सोमबार सार्वजनिक गर्दै राज्यमन्त्री श्रेष्ठले चीनले अनुदानमा दिएको १६ लाख र जापानले दिएको १६ लाख खोप दुई साताभित्र आइसक्ने जानकारी गराएका हुन् । भुटानले दिएको ३ लाख डोज खोप पनि छिट्टै नेपाल आइपुग्ने श्रेष्ठले बताए ।