खोप लगाउन पाएपछि जुम्लाका नागरिकमा उत्साह

२१ साउन, खलङ्गा । दोस्रो लहरको कोरोना भाइरसको खोप लगाउन पाएपछि जुम्लाका बासिन्दामा उत्साह छाएको छ । कोभिडले सास्ती भोगेका नागरिकलाई खोप लगाउन शुरु गरिएपछि उत्साह थपिएको हो ।

बुधबारदेखि ‘भेरोसेल’ खोपको पहिलो मात्र शुरु गरिएको छ । जिल्ला जनस्वास्थ्य कार्यालयले चन्दननाथ नगरपालिकाका– ६ वटा खोप केन्द्रमा खोप लगाइने जिल्ला जनस्वास्थ्य सेवा कार्यालयका खोप शाखा प्रमुख बालकुमारी खड्काले बताए ।

ज्येष्ठ नागरिकलाई पनि खोप लगाउन शुरु गरिएको छ । यहाँका स्थानीय तहमा यही साउन २१ गतेसम्म खोप लगाउने तालिका रहेको जिल्ला जनस्वास्थ्य कार्यालयले जनाएको छ । जिल्लाभरी ११४ खोप केन्द्र रहेकाले अहिले जनस्वास्थ्य कार्यालयसहित जिल्लाभरका जनशक्ति यसैमा केन्द्रीत भएर काम गरेको खोप शाखा प्रमुख बालकुमारी खड्काकाले बताए ।

सरकारले शिक्षकका लागि पनि खोप लगाउने अवसर दिएकामा शिक्षक खुशी भएका छन् । शिक्षक जयशङ्कर धिताल विद्यार्थी र समाजसँग प्रत्यक्ष सम्पर्क हुने भएकाले खोप पाए भने सुरक्षित हुने बताए । सरकारले स्वास्थ्यकर्मीसहित अत्यावश्यक काममा लागेका सुरक्षाकर्मी, पत्रकारलाई पनि खोपको व्यवस्था गरेको छ ।

जुम्लाका एक हजार ४० स्वास्थ्यकर्मीलाई खोप लगाइएको छ । यहाँका करिब ५० पत्रकारले पनि खोप लगाएका छन् । केन्द्रमा अहिले खोप लगाउने व्यक्तिमा उत्साह थपिएको नगरपालिकाको स्वास्थ्य शाखाले जनाएको छ ।