निषेधाज्ञाले होटल व्यवसायी मारमा, ५ अर्ब भन्दा बढी नोक्सानी ब्यर्होन बाध्य

२४ साउन, नवलपुर । कोभिड १९ को संक्रमण रोक्न गरिएको निषेधाज्ञाले सबैभन्दा बढी पूर्वी नवलपरासीका होटल व्यवसायी मारमा परेका छन् । स्वास्थ्य मापदण्ड पुरा गरेर होटल संचालन गर्न अनुमति भएपनि ग्राहक नहुँदा होटल बन्द नै रहेका छन् ।

केही महिना अघि होटल व्यवसायीलाई खाना र खाजा पकाउन भ्याई–नभ्याई हुन्थ्यो, तर अहिले उनीहरु फुर्सदिला देखिन्छन् । कोरोनाको पहिलो लहरमा अघिल्लो वर्ष झण्डै ९ महिना होटल क्षेत्र प्रभावित बन्न पुग्यो । दोस्रो लहरमा झण्डै ३ महिना बन्द हुन पुगे । असारको १७ गतेबाट नवलपुरमा टेकअवेको अनुमति पाएपनि यातायात नचल्दा कारोबार हुन सकेन ।

स्वदेशमा नै लगानी गरेर आत्मनिर्भर बन्न खोजेका व्यवसायी होटलबाट विस्थापित बन्नुपर्ने अवस्था आएको छ । “विदेश नजाने सोंच राखेर नेपालमा नै व्यवसाय गरेको कोभिड १९ ले गर्दा विस्थापित नै हुनुपर्ने अवस्था आयो, एकछिन खाली नहुने होटल अहिले सुनसान छ ।” कोरोना भाईरस संक्रमणका कारणले गर्दा देशव्यापी रुपमा रहेका साना–ठूला गरेर ६४ हजार होटलहरु मारमा परेको होटल व्यवसायी संघ गण्डकी प्रदेशका वरिष्ठ उपाध्यक्ष गौरीशंकर न्यौपानेले बताए ।

कावासोतीमा लामो समयदेखि होटल व्यवसाय गर्दै आएका होमनाथ पन्थीले भने , “पहिले व्यवसाय राम्रो थियो अलि–अलि बचत पनि हुन्थ्यो तर कोभिड सुरु भएदेखि व्यवसाय घाटामा छ, होटल बिक्री गरौं कसैले किन्दैन, नगरौं घाटामा छ ।” कोठा भाडामा लिएर होटल गरेका व्यवसायीलाई झनै ठुलो समस्या आईपरेको छ । व्यवसाय छोडौं आम्दानीको अर्को पाटो छैन, नछोडौं कोठा भारा तिर्न सक्ने अवस्था छैन । भाडामा होटल सञ्चालन गरेकाहरु चिन्तित छन् ।

त्यस्तै कावासोतीमा नै होटल गर्नै भविश्वर कंडेलले व्यापार नभएपछि कोठाभाडा तिर्न पनि धौ–धौ परेको बताउँछन् । उनी भन्छन् “हामी जस्तो भाडामा सञ्चालन गर्नेहरुलाई भाडा तिर्नपनि मुस्किल छ, सबै व्यवसाय खुल्दा पनि होटल खुल्न दिँदैनन् निकै गाह्रो छ ।”कोभिड १९ पुर्वको अवस्थामा हुने व्यापारको तुलनामा अहिले पाँच प्रतिशत पनि व्यापार नभएको होटल व्यवसायीहरु बताउँछन् ।

जिल्लामा करिब १५ सयको हाराहारीमा होटल तथा रेष्टुरेन्टहरु छन् । आन्तरिक तथा बाह्य पर्यटकको चहलपहल नहुन, त्रसित मानसिकताका कारण बाध्यकारी अवस्था बाहेक होटलमा यात्रु नआउनु, खोप नपाउँदा होटल सञ्चालन गर्न डराउनु जस्ता कारण व्यापार
घटेको छ । समयमा नै खोप नपाउनु र तेस्रो लहरको कोभिडको हल्लाका कारण झनै चिन्तित बनाएको व्यवसायीको गुनासो छ ।

नवलपुर जिल्लामा ५ अर्व भन्दा बढी नोक्सान होटल व्यवसायीले व्यहोर्नु परेको भन्दै मापदण्ड अनुरुप होटल संचालन गर्न समेत व्यवसायीहरुलाई न्यौपानेले आग्रह गरे ।