पार्टी समायोजनका नाममा वितरण गरिएका सदस्यता नरोकिएसम्म महाधिवेशनमा जान सकिन्नः शेखर कोइराला

२७ साउन, काठमाडौं । नेपाली कांग्रेसको आसन्न १४ औं महाधिवेशन अनिश्चित भईरहेका बेला सभापतिका बलिया दावेदारसमेत रहेका नेता डा. शेखर कोइरालाले पार्टी समायोजनका नाममा प्रक्रिया नपुर्याई वितरण गरिएका सदस्यता नरोकिएसम्म महाधिवेशनमा जान नसकिने बताएका छन् ।

आज बिहान सामाजिक सञ्जाल फेसबुकमार्फत नेता कोइरालाले तल्लो तहबाट विधान र प्रक्रियागत ढंगले आएका, छानविन समितिले मापदण्ड बनाई निर्णय गरिएका बाहेक केन्द्रबाट विधि विपरित थपिएका क्रियाशील सदस्यता खारेज नभएसम्म महाधिवेशन नै हुन नसक्ने चुनौति दिएका हुन् ।

क्रियाशील सदस्यता विवादकै कारण गत साउन १२ गतेदेखि शुरु हुने भनिएको वडा, गाउँ, प्रदेश , क्षेत्र र जिल्लास्तरीय अधिवेशन नै अन्यौलग्रस्त बनेको छ । क्रियाशील सदस्यता वितरण र नवीकरणका लागि वडा, पालिका, प्रदेश निर्वाचन क्षेत्र, जिल्ला गरी चार तहबाट प्रक्रिया पुर्‍याएर आएमात्र सूचीकृत गर्ने कांग्रेसले मापदण्ड बनाएको थियो । तर अधिकांश ठाउँमा उक्त चार तहगत प्रक्रिया नपु–याई केन्द्रमा एकतफी सूची पठाइएको थियो ।

कांग्रेसद्धारा रमेश लेखकको संयोजकत्वमा गठित छानविन समितिले सो बारे शीर्ष नेताहरूले राजनीतिक निर्णय लिने गरी सहमति खोज्नुपर्ने प्रतिवेदन दिएको छ । त्यसरी सहमति गरेर मात्र महाधिवेशनमा जान नसकिने डा. शेखरको पछिल्लो भनाई सार्वजनिक भएको छ ।

बारा, सप्तरी र धनुषा ४ नम्बर क्षेत्र र सर्लाही २ नम्बर क्षेत्रमा पनि क्रियाशील सदस्यता विवाद कायमै छ । यस्तै विजय गच्छदार, सुनिल थापा समूहका लगायत अन्य पार्टीबाट प्रवेश गरेका जिल्लाका नेता कार्यकर्ताको हकमा पनि क्रियाशील सदस्यता विवाद कायमै छ ।