लुम्बिनी प्रदेशमा बहुमतको सरकार गठन गर्न प्रदेश प्रमुख शेरचनको आव्हान

२७ साउन, बुटबल । लुम्बिनी प्रदेशका प्रदेश प्रमुख अमिक शेरचनले भोलि बिहीबार ३ बजेसम्मको समय दिएर नयाँ सरकार गठनका लागि आव्हान गरेका छन् । देश प्रमुख शेरचनले २२ घन्टाको समय दिएर नयाँ सरकार गठनका लागि दलहरुलाई आह्वान गरेका हुन् ।

प्रदेश प्रमुख शेरचनले आज बुधबार ५ बजे एक सूचना जारी गर्दै भोलि ३ बजेभित्र सरकार गठनका लागि दललाई आह्वान गरेपछि गठबन्धन दलहरु नयाँ सरकार गठनको तयारीमा जुटेका छन् ।

प्रतिपक्षी नेपाली कांग्रेसलगायतका गठबन्धन दलहरुले मुख्यमन्त्रीबिरुद अविश्वास प्रस्ताव पेश गर्दै विशेष अधिवेशन आव्हान भैसकेपछि मुख्यमन्त्री शंकर पोखरेलले पदबाट राजीनामा दिएका थिए ।

संविधानको धारा १६९ को उपधारा १ को खण्ड ‘क’ बमोजिम मुख्यमन्त्री पोखरेलले साउन २७ गते राजीनामा दिएकाले प्रदेश प्रमुखले संविधानको धारा १६८ को उपधारा २ बमोजिम बहुमतको सरकार गठन गर्न आह्वान गरेका हुन् ।

प्रतिपक्षी चार दलीय गठबन्धनसँग ४२ सांसद पुगेका छन् । यहाँ माओवादी केन्द्रका संसदीय दलका नेता कुलबहादुर केसीलाई मुख्यमन्त्री बनाउने बारे गठबन्धन दलहरुबीच सहमति भएको छ । सम्भवतः भोलि नै केसी नयाँ मुख्यमन्त्रीका रुपमा नियूक्त हुनेछन् ।