लुम्बिनी प्रदेशको नयाँ मुख्यमन्त्रीमा केसी नियूक्त, आजै शपथ लिने

२८ साउन, बुटबल । माओवादी केन्द्र संसदीय दलका नेता कुलप्रसाद केसी लुम्बिनी प्रदेशको मुख्यमन्त्रीमा नियुक्त भएका छन् ।

आजै चार दलीय गठबन्धनले ४२ सांसदहरुको हस्ताक्षरसहित केसीको नाममा आफूहरुको समर्थन रहेको भन्दै प्रदेश प्रमुख समक्ष दावेदारी प्रस्तुत गरेपछि प्रदेश प्रमुख अमिक शेरचनले उनलाई मुख्यमन्त्रीमा नियुक्त गरेका हुन् । केसीलाई कांग्रेस, जनमोर्चा र जसपा समेतको समर्थन रहेको छ ।

हिजो मात्रै एमालेबाट निर्वाचित मुख्यमन्त्री शंकर पोखरेलले राजीनामा दिएपछि संविधानको धारा १६८ को उपधारा २ बमोजिम दुई वा दुईभन्दा बढी दलको बहुमत पुर्याएर नयाँ सरकार गठनका लागि दावी पेश गर्न प्रदेश प्रमुखले २२ घण्टाको समयसीमा दिएका थिए ।

नवनियुक्त मुख्यमन्त्री केसी रोल्पा १ (क) बाट निर्वाचित भएका थिए । प्रदेश प्रमुखले केसीलाई मुख्यमन्त्री नियुक्त गरेसँगै आजै शपथग्रहण गराउने तयारी गरिएको छ ।