देउवा निवास बुढानीलकण्ठमा घेराउ तथा प्रर्दशन, सुरक्षा व्यवस्था कडा

२८ साउन, काठमाडौं । भदौ २३ को समयसीमा भित्रै महाधिवेशन सुनिश्चित गर्न माग राख्दै नेपाली कांग्रेसका यूवा नेताहरुले देउवा निवास घेराबन्दी गरेका छन् । महाधिवेशन कै बारेमा प्रधानमन्त्री तथा पार्टी सभापति शेरबहादुर देउवा निवास बुढानीलकण्ठमा केन्द्रीय समितिको बैठक बसिरहेको बेला यूवा नेताहरुले विभिन्न प्लेकार्डसहित निवास घेराउ गरी प्रर्दशन गरेका छन् ।

महाधिवेशन अनिश्चित हुँदै जादाँ पार्टी वैधानिकता नै संकटमा पर्ने चिन्ता लिएर नेपाली कांग्रेसका युवा नेताहरू नेतृत्वको ध्यानाकर्षणका लागि प्रदर्शन उत्रिएको यूवा नेता रञ्जित कर्णले नेपालबहस डटकमलाई बताए । समायोजनका नाममा क्रियाशील सदस्यताको धाँधली बन्द गर्न पनि उनले माग गरेका छन्।

‘कांग्रेसले विधान र संविधानलाई कांग्रेसले पालना गर्नुपर्छ। विधानले चार वर्षमा महाधिवेशन गर्ने भनेको छ। तर एक वर्ष थपेर संविधान अनुसार छ महिना अझै थप गर्दा पनि महाधिवेशन सुनिश्चित भएन,’ उनले नेपालबहससँग भने ।

१४ औं महाधिवेशन समयमै गर्नुपर्ने भन्दै “सबल कांग्रेसका लागि हाम्रो अभियान”मा आबद्ध रहेका युवाहरूले प्रदर्शन गरेका हुन् । पार्टीका सातै प्रदेशका नेता तथा कार्यकर्ताले बिहीबार साझँ प्रतिनिधिमुलक रूपमा प्रदर्शन र धर्ना दिएको अर्का यूवा नेता क्षितिज भण्डारीले बताए ।

प्रधानमन्त्रीसमेत रहेका कांग्रेस सभापति शेरबहादुर देउवालाई भेटेर उनीहरुले पार्टीको विधान र नेपालको संविधान पनि बुझाएका छन् । केन्द्रीय समितिमा नरहेका युवा नेताहरूले थालेको ‘सबल कांग्रेस निर्माणका लागि हाम्रो अभियान’का तर्फबाट त्यहाँ पुगेका युवा नेताहरूको भीडका कारण बूढानीलकण्ठ वरपरको सुरक्षा व्यवस्था कडा पारिएको छ ।

बाहिर आन्दोलन भइरहँदा भित्र नेताहरू भने केन्द्रीय समिति बैठक बसिरहेका छन् । पार्टीले आज महाधिवेशन सार्ने बारे महत्वपूर्ण निर्णय गर्ने बताइएको छ ।

झलकहरू:-