नेशनल ल कलेजका बिद्यार्थीद्वारा महिला हिंसा र शान्ति सुरक्षाबारे सांसदहरूलाई सुझाव

२९ साउन, काठमाडौं । कोरोना कहरले सबैतिर सुस्तता आएको बेलामा नेशनल ल कलेज र युएनडीपीको सहकार्यबाट भने एउटा सृजनात्मक काम सम्पन्न भएको छ । उनीहरुको संयुक्त प्रयासबाट महिला र शान्ति सुरक्षा सम्बन्धमा अनुसन्धान गरी त्यसको निष्कर्ष प्रदेश सांसदहरूलाई उपलब्ध गराएका छन् ।

सो अनुसन्धान निष्कर्षले सांसदहरूलाई आगामी दिनमा महिला र महिला सम्बद्ध क्षेत्रको समस्या बुझ्न, केलाउन र समाधान खोज्न निकै उपयोगी हुने सहभागी बिद्यार्थीहरुले बताएका छन् । महिलाका समस्या बुझ्न र समाधानका बाटा खोज्न यो उपलब्धिपूर्ण हुने देखिएको छ । आज दिउँसो मात्र सोही कार्यक्रमको “फाइनल पेपर सेयरीङ’ भएको हो ।

संयुक्त राष्ट्र संघ विकास प्रोजेक्ट (युएनडीपी) नेपालमा लामो समयदेखि कार्यरत रहेको संस्था हो । युएनडीपी संयुक्त राष्ट्र संघको एउटा अंग भएको हुँदा अरु एनजीओ र आईएनजीओ भन्दा यो फरक हुने नै भयो । यसले हाल नेपालमा महिला, कानुन, सुरक्षा, विकास, वातावरण लगायतका धेरै क्षेत्रमा काम गरेको छ ।

संयुक्त राष्ट्र संघले महिला र विकास विषयमा गरेको विशेष प्रयास अन्तरगत नेपालमा पनि यसतर्फ विभिन्न प्रयासहरू भएका छन् । पछिल्लो समय विभिन्न शैक्षिक संस्थाहरूसँग सहकार्य गरेर युएनडीपीले कार्यक्रम चलाउँदै आएको छ । हालको यो कार्यक्रम पनि त्यसैको एक अंश रहेको बताइएको छ ।

युएनडीपी जस्ता संस्थाको सहकार्यमा हुने कार्यक्रमहरू विभिन्न शैक्षिक संस्थाहरूमार्फत हुँदा त्यसमा धेरै सहजता हुने र त्यस्ता कार्यक्रमले सार्थकता पाउने अनुमान गर्न सकिन्छ। अनुसन्धानात्मक विषयमा बिद्यार्थीहरूको प्रयोग हुँदा शैक्षिक खोजी र अन्वेषणात्कम कार्य हुन सहज हुने विश्वास लिइएको छ । बिद्यार्थीबाट गरिने कार्यक्रमले शैक्षिक गुणस्तर कायम गर्ने मात्र नभई भोलिका भविष्यका धरोहर बिद्यार्थीहरू आफै पनि सम्वद्ध ज्ञानबाट प्रशिक्षित हुने अवसर पाउछन् ।

यो सहकार्यमा नेशनल ल कलेजका एकसय जना विधार्थीहरू सहभागी भएका थिए । ती सबैलाई महिला, शान्ति र सुरक्षा विषयमा एक एक कार्यपत्र लेख्न लगाइएको थियो । त्यस मध्येका उत्कृष्ट कार्यपत्र लेख्ने बिद्यार्थीहरू छनौट गरिएको छ । यसरी छनौट भएका बिद्यार्थीहरुलाई अनुसन्धान गर्ने र अनुसन्धानात्मक प्रतिवेदन तयार गर्न प्रशिक्षित गरी एउटा उपयोगी अनुसन्धान रिर्पोट तयार गरिएको हो । यसको लागि फेलोसिप समेत दिइएको आयोजकले जनाएको छ ।

यसरी फेलोसिप पाउने बिद्यार्थीहरूमा बीए एलएलबी नवौं सेमेष्टरका बन्दिता रेग्मी, सदिक्षा महर्जन, ज्योती शर्मा, बीए एलएलबी सातौं सेमेष्टरकी अपेक्षा पाण्डे र बीए एलएलबी चौथो समेष्टरका सदिन कार्की रहेका छन् ।

कार्यक्रममा विभिन्न श्रोत व्यक्तिहरूलाई सहभागी गराइएको थियो । अदालतका न्यायाधीश, प्रहरी अधिकृत, अधिकारकर्मी, सरोकारवाला क्षेत्रमा संलग्न व्यक्तिहरू र नेशनल ल कलेजका अन्य प्राध्यापकहरू र सिनियर बिद्यार्थीबाट समेत प्रशिक्षण दिइएको छ । अनुसन्धानका क्रममा प्यानल डिस्कसन, छलफल, विभिन्न प्रस्तुतिकरण, विषयवस्तु केन्द्रित अध्ययन प्रवचन आदि गरिएको थियो । करिब ३ महिना लामो यस कार्यक्रममा प्रदेश सभासद, श्रोत व्यक्ति, विषय विज्ञ, शिक्षक बिद्यार्थीहरू बीच विभिन्न किसिमका सहकार्य भएको बताइन्छ।

उक्त प्रतिवेदनमा नेपालका महिलाले शान्ति र सुरक्षाका क्षेत्रमा भोग्नु परेका अप्ठ्याराहरूलाई पहिचान र संकलन गरिएको छ । ती समस्याहरूलाई समाधान गर्नका लागि उपाय खोजी गरी कस्को कस्तो भूमिका हुन्छ भन्ने जिम्मेवारी किटान गरिएको छ । प्रदेश सांसदहरूको भूमिका पनि स्पष्ट गरिएको छ। अब त्यो प्रतिवेदन प्रदेश सांसदहरूको पहुँचमा पुर्याई आवश्यक सरकारी ऐन, नियम र नीति बनाउने र महिला मैत्री वातावरण सृजना गर्ने प्रक्षेपण गरिएको छ।

महिला बिरुद्दमा यौनजन्य हिंसा, घरेलु हिंसा, सामाजिक र आर्थिक शोषणको बढोत्तरी भएको अहिलेको समयमा यस्ता कार्यक्रमले सफलता पाउन जरुरी हुन्छ । यो कार्यले नीति बनाउने कार्य मात्र नभई कार्यान्वयन हुने अवस्था पनि सृर्जना गराओस् ।