कांग्रेसको १४ औं महाधिवेशन मंसिर ९ देखि १३ गते हुने, वडा अधिवेशन भने भदौ १८ बाटै शुरु

३० साउन, काठमाडौं । लामो रस्साकस्सी र, विवाद र छलफलपछि नेपाली कांग्रेसको १४ औं महाधिवेशन आउँदो मंसिरमा गरिने भएको छ । तर विवादको जड मानिएको वडा अधिवेशन भने यही भदौ १८ गतेबाट प्रारम्भ हुनेछ ।

गत विहीबारदेखि बुढानीलकण्ठमा जारी केन्द्रीय समिति बैठकले मंसिर ९ देखि १३ गतेसम्म केन्द्रीय महाधिवेशन गर्ने निर्णय गरेको हो ।

क्रियाशील सदस्यता विवादले यही भदौ १६ देखि १९ गतेसम्म हुने भनि तोकिएको चौधौं महाधिवेशनका बारेमा विवाद बढ्दै गएपछि आज शनिबारको कांग्रेस वैठकले भदौमै वडा अधिवेशन प्रारम्भ गरी मंसिरमा केन्द्रीय महाधिवेशन गर्ने निर्णय गरेको हो ।

आज बसेको बैठकको निर्णय अनुसार अब भदौ २ गतेसम्म क्रियाशील सदस्यताको अन्तिम नामावली टुंगो लगाउने समय तोकिएको छ । त्यस्तै भदौ २ गते नै निर्वाचन निर्देशिकालाई अन्तिम रुप दिने कांग्रेसको कार्यतालिका छ ।

वडा अधिवेशन भदौ १८, गाउँ तथा नगर अधिवेशन भदौ २७, प्रदेश निर्वाचन क्षेत्रको अधिवेशन असोज १, संघीय निर्वाचन क्षेत्रको अधिवेशन असोज ५, जिल्ला अधिवेशन असोज १० र प्रदेश अधिवेशन कात्तिक १० देखि १२ गतेसम्मका लागि तोकिएको छ ।