अध्यादेशबाट राजकाज चलाउने सोचको समर्थन गर्न सकिदैन : डा. कोइराला

१ भदौ, काठमाडौं । नेपाली कांग्रेसका नेता डा. शेखर कोइरालाले सरकारले सिफारिस गरेको दल विभाजनसम्बन्धी अध्यादेशको विरोध गरेका छन् ।

डा. कोइरालाले ट्विट गर्दै सरकार सञ्चालनको सुविधाका लागि यो अध्यादेश ल्याइएको हुनसक्ने भन्दै अध्यादेशबाट राजकाज चलाउने सोचको समर्थन गर्न नसकिने बताएका हुन् ।

यो कदम प्रधानमन्त्री शेरबहादुर देउवाको भूल भएको उनले टिप्पणी गरेका छन् । सरकार संसदबाट परिमार्जन र सुधारसहितको बजेट पारित गर्नेतर्फ सक्रिय हुन पनि नेता कोइरालाले सुझाव दिएका छन् ।

सरकार सञ्चालनको सुबिधाको लागि राजनीतिक दल सम्बन्धि अध्यादेश ल्याईएको हुनसक्छ तर अध्यादेशवाट राजकाज चलाउने साेचकाे समर्थन गर्न सकिन्न।
सरकारले संसदबाट परिमार्जन र सुधार सहित बजेट पास गर्ने तर्फ सकृयता देखाउनु पर्थ्यो। याे चुक प्रधानमन्त्रीबाट भयाे। यो कांग्रेसको संस्कार होइन।

— Dr Shekhar Koirala (@Shekharnc) August 17, 2021

यस्तै, कांग्रेसका अर्का नेता प्रदीप पौडेलले तत्कालीन प्रधानमन्त्री केपी शर्मा ओलीले अध्यादेश ल्याउँदा आफूहरुले विरोध गरेको स्मरण गरेका छन् ।  राजनीतिक दल विभाजनलाई सहज बनाउने गरी सरकारले ल्याएको राजनीतिक दलसम्बन्धी अध्यादेशको नेपाली कांग्रेसभित्रै विरोध भएको छ ।