राष्ट्रिय टोलीका स्पिनर सन्दीपले सीपीएल नखेल्ने

२ भदौ, काठमाडौं । नेपाली राष्ट्रिय टोलीका स्पिनर सन्दीप लामिछाने राष्ट्रिय टिममा व्यस्त हुँदा क्यारेबियन प्रिमियर लिग ‘सीपीएल’ गुमाउने भएका छन् ।

सन्दीप ट्रीनबागो नाइट राइडर्समा आबद्द थिए । सीपीएलले सार्वजनिक गरेको सहभागी टिमको खेलाडी सूचीमा सन्दीपको नाम छैन । २०२१ को सीपीएल क्रिकेट अगस्ट २८ बाट सुरु हुनेछ ।

तर, सीपीएलकै समय नेपाली टिम ओमान भ्रमणमा जाने पक्का भएपछि सन्दीपले सीपीएल नखेल्ने भएका हुन् ।आईसीसी विश्वकप क्रिकेट लिग–२ अन्तर्गत ओमान र अमेरिकासँगको त्रिकोणात्मक एकदिवसीय सिरिजका लागि नेपालले ओमानको भ्रमण गर्ने तालिका रहेको छ ।

सिरिज अघि नेपाली टोलीले पपुवा न्युगिनी ‘पीएनजी’ सँग दुई खेलको एकदिवसीय अन्तराष्ट्रिय क्रिकेट सिरिज खेल्ने छ ।

सन्दीपले यस अघि तीन सिजन सीपीएल खेलिसकेका छन् । सन्दीपले गत सिजन जमैका तलावाजबाट खेलेका थिए ।त्यसअघि सन्दीपले सेन्ट किट्स एण्ड नेभिस प्याट्रीओट्स र बार्बाडोस ट्राइडेन्ट्सबाट खेलेका थिए ।

सन्दीपले यस अघि भिषा समस्याको कारण द हन्ड्रेड क्रिकेट र भाइटालिटी टी-ट्वान्टी ब्लास्ट क्रिकेट गुमाएका थिए ।