पर्सा प्रहरीले गायब गर्यो २६ थान मोबाइल

३ भदौ, बीरगञ्ज । जिल्ला प्रहरी कार्यालय पर्साले बरामद गरेको २६ थान मोबाइल गायब भएको छ । गएको शनिबार साँझ बसपार्कबाट एक व्यक्तिसहित २६ थान मोबाइल प्नहरीले नियन्त्रणमा लिएको भएपनि पक्राउ मानिसलाई छाडेर मोबाइल भने प्रहरी आफैले राखेको हो ।

मोबाइलसहित पक्राउ परेका व्यक्तिलाई एक रात हिरासतमा राखेर प्रहरीले छाडेको भएपनि २६ थान मोबाइल बारे अझैसम्म प्रहरीले सार्वजनिक गरेको छैन् । बरामद गरेको मोबाइल सार्वजनिक गर्नुपर्ने भएपनि प्रहरीले ६ दिन बितिसक्दा पनि सार्वजनिक नगरेर लुकाएर राखेको बुझिएको छ ।

आफूले प्रयोग गर्न र चाडबाड नजिकिँदै गरेको बेला आफन्तलाई उपहार दिन जिल्ला प्रहरी कार्यालय पर्साका प्रमुख प्रहरी उपरीक्षक बेलबहादुर पाण्डेको निर्देशनमा प्रहरी अधिकारीहरुले बरामद गरिएका ती मोवाइल सार्वजनिक नगरी आपसमै बाडेको सम्बद्ध स्रोतको दावी छ ।

मोबाइल व्यवसायीका अनुसार प्रहरीले नियन्त्रणमा लिएको मोबाइल बजारमा महंगो मूल्यमा बिक्री हुन्छ । त्यसमध्ये केही एप्पल ब्राण्डका मोबाइल पनि थिए ।

यसरी भएको थियो घटना

गएको शनिबार हेटौँडाका २ जना व्यक्तिले सीमावर्ती भारतीय बजारबाट मोबाइल खरिद गरेर बसपार्क आइपुग्छन् । साँझ परिसकेकाले बीरगञ्जमै बस्ने योजना बनाएर दुबैले होटल खोज्न सुरु गर्छन् । होटल खोजी गर्ने क्रममै उनीहरु उभिएकै ठाउँमा २ जना प्रहरी आइपुग्छ र साथमा भएको झोला चेक गर्दा मोबाइल फेला पार्छ ।

त्यसपछि प्रहरीले बार्गेनिङ सुरु गर्छ । तत्काल ३० हजार बुझाए सामान र मान्छे छाडिदिने भनेर प्रहरीले भन्छ । सँगै रहेका सुजन लामाले अर्को साथीलाई पैसा व्यवस्था गर्न भनेपछि ती साथीले ३० हजार रुपैयाँ व्यवस्था गर्छन् । तर प्रहरीले घटना अहिले नमिल्ने भयो भन्दै जिल्ला प्रहरी कार्यालय लिएर जान्छ ।

जिल्ला प्रहरी कार्यालयमा लामालाई एक रात राखिन्छ । लामाले भित्रैबाट उनीसँगै हेटौँडाबाट आएका साथीलाई अझै २५ हजार र आफूसँग भएको २ थान मोबाइल बुझाउन दवाव दिन्छन् ।

प्रहरीले हिरासतमा राखेका लामाकी श्रीमती सशस्त्र प्रहरी हुन्छिन् । उनैले आफ्नो श्रीमान् लामालाई भोलिपल्ट साँझ छुटाएर लैजान्छिन् । आफू छुटिसकेपछि पनि लामाले सँगै आएका साथीलाई पैसा र मोबाइल प्रहरीमा लगेर बुझाउन भन्दै नबुझाए फसाइदिने भनेर धम्की दिन्छन् ।

तर ती साथीले आफूसँग पैसा नै नभएकाले व्यवस्था गर्न नसक्ने जनाउँछन् । पछि मान्छे छुटे पनि मोबाइल भने अझैसम्म प्रहरीले नै राखेको छ ।

प्रहरी भन्छ, अनुसन्धान भइरहेको छ

जिल्ला प्रहरी कार्यालय पर्साका प्रवक्ता ओमप्रकाश खनालका अनुसार बरामद भएको मोबाइलका विषयमा अनुसन्धान अझै जारी छ । बरामद भएकामध्ये ५/६ वटा नयाँ किप्याड मोबाइल रहेको र अन्य पुराना मोबाइल रहेकाले चोरीको हो कि भन्ने विषयमा छानविन भइरहेको उनले बताए ।

जिल्ला प्रहरी कार्यालयमा आएका उजुरी र आइएमइआई नम्बर जाँच गरेपछि मात्रै आवश्यक कुरा खुल्ने उनको भनाई छ ।