समाचार प्रभाव: पर्सा प्रहरीले सार्वजनिक गर्यो १६ थान मोबाइल, १० थान अझै गायब

४ भदौ, बीरगञ्ज । जिल्ला प्रहरी कार्यालय पर्साले २६ थान मोबाइल गायब पारेको समाचार नेपालबहसले प्रकाशित गरेपछि बाध्य भएर प्रहरीले मोबाइल सार्वजनिक गरेको छ ।

गएको शनिबार बरामद गरेको मोबाइल एक हप्तासम्म पनि सार्वजनिक नगरी गायब गर्न खोजेपछि नेपालबहसले प्रहरीले गायब गर्यो २६ थान मोबाइल भनेर हिजो मात्रै समाचार प्रकाशित गरेको थियो । प्रहरीले मोबाइलसँगै पक्राउ गरेको मान्छे भोलिपल्टै छाडे पनि मोबाइल भने सार्वजनिक गरेको थिएन ।

गएको शनिबार २६ थान मोबाइल बरामद गरेको भएपनि आज सार्वजनिक गरेको सूची अनुसार जम्मा १६ थान मोबाइल मात्रै देखाएको छ ।अझै १० थान मोबाइल प्रहरीले सार्वजनिक गरेको छैन । १० थान मोबाइल आफूले प्रयोग गर्न प्रहरी अधिकारीले भागबण्डा गरेको हुन सक्ने आशंका गरिएको छ ।

यसरी भएको थियो घटना

गएको शनिबार हेटौँडाका २ जना व्यक्ति सीमावर्ती भारतीय बजारबाट मोबाइल खरिद गरेर बसपार्क आइपुग्छन् । साँझ परिसकेकाले वीरगञ्जमै बस्ने योजना बनाएर दुबैले होटल खोज्न सुरु गर्छन् ।

होटल खोजी गर्ने क्रममै उनीहरु उभिएकै ठाउँमा २ जना प्रहरी आइपुग्छ र साथमा भएको झोला चेक गर्दा मोबाइल फेला पार्छ । त्यसपछि प्रहरीले बार्गेनिङ सुरु गर्छ । तत्काल ३० हजार बुझाए सामान र मान्छे छाडिदिने भनेर प्रहरीले भन्छ । सँगै रहेका सुजन लामाले अर्को साथीलाई पैसा व्यवस्था गर्न भनेपछि ती साथीले ३० हजार रुपैयाँ व्यवस्था गर्छन् । तर प्रहरीले घटना अहिले नमिल्ने भयो भन्दै जिल्ला प्रहरी कार्यालय लिएर जान्छ ।

जिल्ला प्रहरी कार्यालयमा लामालाई एक रात राखिन्छ । लामाले भित्रैबाट उनीसँगै हेटौँडाबाट आएका साथीलाई अझै २५ हजार र आफूसँग भएको २ थान मोबाइल बुझाउन दबाब दिन्छन् ।

प्रहरीले हिरासतमा राखेका लामाकी श्रीमती सशस्त्र प्रहरी हुन्छिन् । उनैले आफ्नो श्रीमान् लामालाई भोलिपल्ट साँझ छुटाएर लैजान्छिन् । आफू छुटिसकेपछि पनि लामाले सँगै आएका साथीलाई पैसा र मोबाइल प्रहरीमा लगेर बुझाउन भन्दै नबुझाए फसाइदिने भनेर धम्की दिन्छन् । तर ती साथीले आफूसँग पैसा नै नभएकाले व्यवस्था गर्न नसक्ने जनाउँछन् । मान्छे छुटे पनि मोबाइल भने अझैसम्म प्रहरीले नै राखेको छ ।

प्रहरीले भने अनुसार भएन सार्वजनिक

जिल्ला प्रहरी कार्यालय पर्साले शुक्रबार सार्वजनिक गरेको मोबाइलमा ३ थान आईफोन, ६ थान सामसुङ, पोको २ थान, रेडमी ४ र ओप्पो १ थान रहेको छ । जिल्ला प्रहरी कार्यालय पर्साका प्रवक्ता ओमप्रकाश खनालले बरामद भएकामध्ये केही थान किप्याड मोबाइलफोन रहेको बताए पनि ती मोबाइल भने सार्वजनिक गरिएको छैन ।

प्रहरीले शुक्रबार सूचना निकाल्दै कसैको मोबाइल चोरी भएको भए सूचनामा उल्लेख भएको आइएमइआई नम्बर हेरेर आवश्यक कागजातसहित सम्पर्क गर्न भनेको छ । बरामद भएका मोबाइल पुराना रहेकाले चोरीको हो कि भन्ने आशंकामा छानविनका लागि जिल्ला प्रहरी कार्यालयमा राखिएको र अहिले सूचना जारी गरेर दावी गर्नका लागि आह्वान गरिएको प्रवक्ता खनालले बताए ।

यस्ताे थियाे समाचार:-