अस्पतालको शैष्याबाट झलनाथको विज्ञप्ति, माधव नेपाललाई साथ दिने घोषणा

४ भदौ, काठमाडौं । पूर्व प्रधानमन्त्री झलनाथ खनाल समूहका नेताहरुले एमालेभित्रै एकताको कुरा गरिरहँदा खनालले भने आफू माधव नेपालको पार्टीमा भएको जनाएका छन् । उनले अस्पतालको शैष्याबाटै विज्ञप्ति जारी गरेर आफू नेपालले दर्ता गराएको पार्टीमा रहेको बताएका हुन् ।

एमालेबाट विभाजित भई बनेको नेकपा एकीकृत समाजवादी पार्टीमा झलनाथ खनालको नाम वरिष्ठ नेतामा रहेको छ । हाल दिल्लीस्थित एपोलो अस्पतालमा उपचाररत खनाल नयाँ पार्टी बनेपनि मौन बस्दै आएका थिए ।

एमाले संस्थापनले नयाँ पार्टीमा खनालको संलग्नता नरहेको दावी गर्दै आएका बेला खनालले नयाँ पार्टीलाई आफ्नो साथ र समर्थन रहेको औपचारिक रुपमा उल्लेख गरेका छन् । खनालको सचिवालयले नयाँ पार्टीलाई एमालेका पूर्वअध्यक्ष समेत रहेका उनको साथ र समर्थन रहेको स्पष्ट पारेको हो ।

खनालको आधिकारिक फेसबुकमा सचिवालयले लेखेको छ, ‘भारतको नयाँदिल्लीस्थित एपोलो हस्पिटलमा उपचाररत पूर्व प्रधानमन्त्री झलनाथ खनालज्यू नयाँ दर्ता भएको नेपाल कम्युनिष्ट पार्टी (एकीकृत समाजवादी) को साथ र समर्थनमा रहनुभएको सम्पूर्णमा जानकारी गराउँदछौं ।’

माधव नेपालको नेतृत्वमा नेकपा समाजवादी पार्टीले आजै निर्वाचन आयोगमा दर्ताका लागि निवेदन दिएको छ । उनी समूहमा रहेका सुरेन्द्र पाण्डे, गोकर्ण विष्ट, भीम आचार्य, ठाकुर गैरे लगायतका नेता भने नेपालले गठन गरेको पार्टीमा गएका छैनन् ।