एमालेको तेस्रो धार ओलीसँगै समाहित हुन राजी, बालकोट वार्ता सफल भएको दावी

७ भदौ, काठमाडौं । पूर्व प्रधानमन्त्री माधवकुमार नेपालसँग अलग भएका नेताहरुको माग पूरा हुने संकेत देखिएको छ । सोमबार बिहान बालकोटमा एमाले अध्यक्ष केपी शर्मा ओलीसँग संवाद भएपछि एमालेको तेस्रो धार ओलीसँगै समाहित हुन राजी हुँदै बालकोट वार्ता सफल भएको दावी गरिएको छ ।

उनीहरु र ओलीबीच सहमति भएपछि नेकपा एमालेले १० बुँदे सहमति कार्यान्वयनको प्रक्रिया अघि बढाउन स्थायी कमिटी बैठक बोलाएको छ । माधव नेपालको साथ छाडेका मध्यमार्गी धारका नेताहरूसँगको छलफलपछि मंगलबार स्थायी कमिटी बैठक बस्न लागेको हो ।

ओलीले सोमबार बिहानै बोलाएर छलफल शुरु गरेका थिए । नेकपा एमाले विभाजनमा संलग्न नरहेका तर माधव नेपाल समूहमा रहँदै आएका एकता पक्षधर स्थायी कमिटीका सदस्यहरु अध्यक्ष ओलीसँग निर्णायक छलफल गर्नुे भन्दै मंगलबारसम्म सबै विषय टुंगाउन आग्रह गर्दै आएका थिए ।

तत्कालीन कार्यदलका सदस्य शंकर पोखरेल लगायतका नेताहरुसँग छलफल र वार्ता गरेका भीम रावल, घनश्याम भुसाल, गोकर्ण विष्ट, सुरेन्द्र पाण्डेलगायतका नेताहरु १० बुँदे कार्यन्वयनको विषयमा छलफल गर्न बालकोटबाट बोलावट भएपछि आज छलफलका लागि पुगेका थिए । उनीहरुले कार्यदलले दिएको १० बुँदे सहमतिलाई कार्यान्वयनका लागि मोडालिटी तयार पारे अघि बढ्ने प्रस्ताव गरेका छन् ।

एमाले बनाउन र पार्टी निर्माणमा पाँच दशक लामो संघर्ष गरेका दुई नेता राजनीतिक दल सम्बन्धी अध्यादेश जारी भएपछि विधिवत रुपमै अलग भई नेपालले नयाँ दल गठनका लागि निर्वाचन आयोगमा निवेदन दिइसकेका छन् । एमालेका अध्यक्ष ओली र वरिष्ठ नेपालले अध्यादेश जारीपछि अलग–अलग बाटो समातेपछि नेपालले नयाँ दल खोल्न निवेदन दिएपनि नेपालसँग बिगतदेखि नै साथमा रहेका नेताहरुले भने साथ दिएका थिएनन् ।