मुख्यमन्त्री कुलप्रसाद केसीले पाए पक्षमा ४२ मत

७ भदौ, काठमाडौं । लुम्बिनी प्रदेशका मुख्यमन्त्री कुलप्रसाद केसीले प्रदेशसभामा विश्वासको मत पाएका छन् । सोमबार अपरान्ह प्रदेशसभा भवनमा विश्वासको मत मागेका उनले विश्वासको मत पाएका हुन् ।

मुख्यमन्त्री केसीका पक्षमा ४२ मत आएको सभामुख पूर्णबहादुर घर्तीले प्रदेश सभामा घोषणा गरेर सुनाएका छन्।मुख्यमन्त्री केसीले विपक्ष अर्थात् हुन्न भन्नेमा शून्य मत प्राप्त भएको छ । तटस्थतर्फ १ मत खसेको छ ।

हाल लुम्बिनी प्रदेशसभामा ८० सदस्य रहेका छन् । मुख्यमन्त्री केसीले विश्वासको मत पाउन ४१ सांसदको मत पाउनुपर्ने थियो ।

मुख्यमन्त्री केसीले नेपाली कांग्रेसका १९, माओवादी केन्द्रका १८ ‘सभामुख बाहेक’,जनता समाजवादी पार्टीका ३, राष्ट्रिय जनमोर्चाका १ र स्वतन्त्र सांसद अजय शाहीसहित ४२ सांसदको मत पाएका छन् ।

विपक्षी एमालेका ३७ सदस्य भने अनुपस्थित रहे । साउन २७ गते चार दल र एक स्वतन्त्र गरी ४२ जना प्रदेशसभा सदस्यको समर्थन पाएर मुख्यमन्त्रीमा नियुक्त भएका थिए ।