बारबर्दिया नपाद्वारा बर्दिया कारागारलाई सामाग्री हस्तान्तरण

८ भदौ, बर्दिया ‘गुलरिया’। बर्दिया कारागारमा रहेका कैदीबन्दीहरुको लागि बारबर्दिया नगरपालिकाले विभिन्न सामाग्रीहरु हस्तान्तरण गरेको छ ।

बर्दिया कारागार रहेका कैदीबन्दीहरुले बारबर्दिया नगरपालिकालाई केही समय अगाडि कारागार भित्र विभिन्न समाग्रीहरुको अभावभएको भन्दै पत्र लेखेका थिए । पत्रमा माग भए अनुसारको सामाग्री नगरपालिकाले साेमबार कारागार प्रशासनलाई हस्तान्तरण गरेको हो ।

नगरपालिकाले बर्दिया कारागारमा पाँच सय लिटरका एक थान ट्याङ्की, झाडु, ३२ इन्च टिभि एक थान, उपन्यास १६ थान लगायत करिब एक लाख भन्दा बढिका सामग्री हस्तान्तरण गरेको छ ।

कारागारको अवलोकन पश्चात् बारबर्दिया नगरपालिकाका नगर प्रमुख दुर्गाबहादुर थारुले कैदीबन्दीको आवश्यक्ताको आधारमा सामाग्रीहरु हस्तान्तरण गरिएको बताए। बर्दिया कारागारमा क्षमताभन्दा बढि कैदीबन्दी हुँदा बसाई अस्तव्यस्त रहेको छ ।

महिला र पुरुष गरी एक सय २५ जनाको क्षमता भएको बर्दिया कारागारमा ३ सय ५३ जना रहेका छन् । जसमा पुरुष ३ सय १६,महिला ३४ र नावालक २ जना रहेका छन् । कारागारका कोठा साना भएको कारणले कैदीबन्दीलाई साँगुरो स्थानमा भुईमा सुत्नु पर्ने बाध्यता रहेको छ ।

कारागारका कैदीबन्दीले आफुहरुको समस्या समाधानका लागि हरेक पालिकाहरुमा कारर्पेट, सरसफाई सामाग्री लगाएतको माग राख्दै पत्र लेखेका थिए । सोही अनुरुप बारबर्दिया नगरपालिकाले सामाग्री हस्तान्तरण गरेको हो ।