प्रियंका भुजेल हत्या घटनाका अभियुक्त सार्वजनिक

८ भदौ, सर्लाही । प्रियंका भुजेल हत्याकाण्डको घटनामा संलग्न भनिएका अभियुक्तलाई प्रहरीले सार्वजनिक गरेको छ । घटनामा संलग्नताको आरोपमा लालबन्दी नगरपालिका–१७ का अनिष दहाल र कृष्ण साहलाई प्रहरीले सार्वजनिक गरेको हो ।

भुजेल ३१ साउनदेखि बेपत्ता थिइन् । प्रहरीले ती युवाहरूलाई १ भदौमा पक्राउ गरेपछि उनीहरूकै बयानका आधारमा युवतीको शव २ भदौमा सर्लाहीको लालबन्दी नगरपालिका–६ स्थित कालिन्जोर खोलाको बगरमा फेला परेको थियो ।

प्रारम्भिक अनुसन्धान र बयानबाट प्रियंकाको हत्या ती युवाहरूले नै गरेको खुलेको जिल्ला प्रहरी कार्यलय सर्लाहीका प्रमुख एसपी संतोषसिंह राठौरले पत्रकार सम्मेलनमा जानकारी दिए ।

पक्राउ परेकालाई सोमबार दोस्रो पटक म्याद थप गरेर अनुसन्धान भइरहेको एसपी राठौरले बताए ।