कांग्रेस पार्टी कार्यालयमा जिल्ला सभापतिहरुको धर्ना

८ भदौ, काठमाडौं । नेपाली कांग्रेसले क्रियाशील सदस्यताको विवाद टुंगाएको दावी गरेकै दिन वरिष्ठ नेता रामचन्द्र पौडेल पक्षधर जिल्ला सभापतिहरु सूची सार्वजनिक गर्न माग गर्दै धर्नामा बसेका छन् ।

क्रियाशील सदस्यको सूची सार्वजनिक गर्न गत भदौ ७ गतेसम्मको समयसीमा दिएका उनीहरुले माग सम्बोधन नभएको भन्दै पार्टी केन्द्रीय कार्यालय सानेपामा आजदेखि धर्ना सुरु गरेका हुन् ।

नेपाली कांग्रेसको नुवाकोट जिल्लाका सभापति जगदिश्वर नरसिंह केसीले आफूहरुले आजदेखि सांकेतिक रुपमा एक घण्टामात्रै धर्ना दिने बताए । माग सम्बोधन नभए धर्ना जारी रहने उनको भनाई छ ।

‘जबसम्म वेबसाइटमा सदस्यता सार्वजनिक गरिंदैन, जबसम्म जिल्ला सभापतिहरुको उम्मेदवारी एकरुपता हुँदैन र सच्याउने मौका पाइँदैन, तबसम्म हाम्रो धर्ना कार्यक्रम जारी रहन्छ,’ उनले भने । क्रियाशील सदस्यता पारदर्शी नभएकाले आन्दोलनमा उत्रिनु परेको उनले बताए ।