नारायणकाजीलाई प्रवास पठाइएयो, महरालाई प्रवक्ताको जिम्मेवारी

९ भदौ, काठमाडौं । नेकपा माओवादी केन्द्रले केन्द्रीय नेताहरुको कार्यविभाजनमा उपाध्यक्ष नारायणकाजी श्रेष्ठलाई महत्वपूर्ण विभाग र जिम्मेवारीबाट हटाएर प्रवासको जिम्मेवारीमा पठाइएको छ ।

हालै सम्पन्न केन्द्रीय समिति बैठकबाट सो पार्टीले प्रदेश, प्रवास, जिल्ला समन्वय, उपत्यका समन्वय, सम्पर्क जस्ता समिति गठन गरेर नेताहरुको जिम्मेवारी तोक्दै माओवादीले श्रेष्ठलाई प्रवासको जिम्मेवारी तोकको हो । त्यस्तै पूर्व सभामुख कृष्णबहादुर महरालाई पार्टी प्रवक्ताको जिम्मेवारी तोकिएको छ ।

यसअघि महराले लिएको जिम्मेवारीमा श्रेष्ठ थिए । श्रेष्ठले आफू प्रचण्डपछिको दोस्रो नेता भएकाले प्रवक्ता नबस्ने जनाएका थिए । सोही अनुसार उनलाई प्रवासको जिम्मेवारी दिइएको माओवादीले जनाएको छ । माओवादीद्धारा नवगठित समितिमा कतै इन्चार्ज मात्रै तोकिएको छ भने कतै सहइन्चार्ज, अध्यक्ष र सचिव पनि तोकिएको छ ।

यस्तै माओवादीले केन्द्रीय विभाग पनि गठन गरेको छ । जसअनुसार अर्थ विभागको प्रमुखमा वर्षमान पुन रहेका छन् भने कृषि तथा भूमिसुधार विभागमा हरिबोल गजुरेल, उद्योग तथा वाणिज्य विभागमा वामदेव क्षेत्री, कृषि तथा आर्थिक व्यवस्थापन विभागमा डोरप्रसाद उपाध्याय, उपभोक्ता हित तथा आपूर्ति विभागमा मातृकाप्रसाद यादव, खानेपानी तथा सरसफाइ विभागमा बिना मगर, प्रवक्तामा कृष्ण बहादुर महरा, संगठन विभागमा जनार्दन शर्मा प्रमुख रहेका छन् ।

यसैगरी स्कुल विभागमा प्रचण्ड तथा प्रमुखमा गिरिराजमणि पोखरेल रहेका छन् । यता यसअघि प्रवक्ता रहेका नारायणकाजी श्रेष्ठ प्रवास समिति इन्चार्ज रहेका छन् । यस्तै माओवादीले जनवर्गीय तथा सामुदायिक संगठनका इन्चार्ज पनि तोकेको छ । माओवादीले रिक्त रहेका समिति र बाँकी केन्द्रीय सदस्यहरुको जिम्मेवारी पछि तोकिने पनि अध्यक्ष प्रचण्डले गरेको आन्तरिक परिपत्रमा उल्लेख गरिएको छ ।