प्रदेश १ मा मूख्यमन्त्री परिवर्तन हुँदै, आचार्यले आजै शपथ लिने संभावना

१० भदौ, काठमाडौं । नेकपा एमालेको केन्द्रीय कमिटीे बैठक अघि नै प्रदेश १ को मूख्यमन्त्री परिवर्तन हुने भएको छ । चार दिन यता काठमाडौमा रहेका प्रदेश १ का मूख्यमन्त्री अहिले बिहान विराटनगर पुगेका छन् । उनले आजै राजीनामा दिएर संसदीय दलको नेतामा भीम आचार्यलाई प्रस्ताव गर्दै आजै मूख्यमन्त्री नियुक्तिको तयारी भएको छ ।

आचार्यलाई दलको नेता चयन गर्न अहिले ११ बजे एमाले प्रदेश–१ संसदीय दलको बैठक बस्दैछ । बैठकका बारेमा सांसदहरुले सार्वजनिक नबोले पनि ११ बजे फाइनल भएको र नयाँ संसदीय दलको नेता चयन हुने उनीहरुको भनाई छ । ‘बैठकले संसदीय दलको नेतामा भीम आचार्यलाई चयन गर्ने र ३ बजेभित्रै मुख्यमन्त्रीको शपथ लिने सम्भावना छ,’ प्रदेश १ का एक सांसदले भने ।

आचार्यलाई मुख्यमन्त्री र संसदीय दलको नेता बनाउँदा प्रदेशभरका बहुसंख्यक माधवपक्षीय सदस्यहरु एमालेमै बस्ने र सरकारको नेतृत्व पनि एमालेमै रहने बुझाईका साथ मुख्यमन्त्री शेरधन राईले लचकता देखाउन लागेका हुन् । ‘अब गुट भन्दा पार्टी महत्त्वपूर्ण भएकोले जे गर्दा एमाले पार्टी र सरकार जोगिन्छ त्यही गर्न मुख्यमन्त्री तयार हुनुहुन्छ,’ ती सांसदको भनाई छ ।

२०७४ माघ २६ गते एमालेका ५१ सांसदमध्ये शेरधनले २४ का विरुद्ध २६ मत ल्याएर संसदीय दलको नेता निर्वाचित भएका थिए । खोटाङका सांसद राजन राईको मत बदर भएको थियो । साढे तीन वर्ष अगाडि गुटको लाइनमा चुनाव लढेका राई र आचार्य एमाले जोगाउने मुद्दामा भने एक भएका छन् ।

माधव नेपाल समूहबाट भोजपुरकै राजेन्द्र राईले मूख्यमन्त्रीमा दावी गरिरहेका छन् । अहिले नेकपा एकिकृत समाजवादीमा लागेपछि राईले मूख्यमन्त्री हुने इच्छा देखाएका हुन् । २०७४ फागुन २ मा मुख्यमन्त्री भएका राई २०७८ भदौ १० मा आएर त्याग गर्न तयार भएका छन् । ९३ सदस्यीय प्रदेश–१ को प्रदेशसभामा एमालेका ५१ सदस्य छन् ।

४७ सदस्यले मुख्यमन्त्री बन्ने मत पुग्ने भएकोले जतिसक्दो जोगाउन आचार्य र राई एक भएका हुन् । पार्टीमा असार २७ गरिएको १० बुँदे कार्यान्वयन भएपछि आचार्य प्रदेश १ को इन्चार्ज समेत हुन । अहिले प्रदेश–१ मा भोजपुरका राजेन्द्र राई, खोटाङका राजन राई र पाँचथरका गणेशकुमार कम्बाङ मात्रै एमालेबाट टुक्रिएर बनेको नेकपा एकीकृत समाजबादीमा गएका छन् ।

यसअघि बाग्मती प्रदेशमा अष्टलक्ष्मी शाक्य मूख्यमन्त्री भैसकेकी छिन् । अष्टलक्ष्मी शाक्यले आफू ओली र नेपाल दुवै जनाको समर्थनमा मूख्यमन्त्री भएको बताउदै आएकी छिन् । उनी बाग्मती प्रदेशको एमाले इन्चार्ज पनि हुन् ।