महाकाली नदीमा बेपत्ता धामीको परिवारलाई सरकारले १० लाख उपलब्ध गराउने

१० भदौ, काठमाडौं । सरकारले दार्चुलास्थित महाकाली नदीमा बेपत्ता भएका जयसिंह धामीको परिवारलाई सहयोग स्वरुप १० लाख रुपैयाँ उपलब्ध गराउने निर्णय गरेको छ ।

प्रधानमन्त्री निवास बालुवाटारमा बिहीबार बसेको मन्त्रिपरिषद बैठकले गत साउन १५ गते भारतीय सुरक्षा बल ‘एसएसबी’ले तुइन फुस्काउँदा महाकाली नदीमा बेपत्ता भएका दार्चुलाको व्यास गाउँपालिका–२ का धामीको परिवारलाई सरकारले आर्थिक सहायता स्वरुप १० लाख राहत दिने निर्णय गरेको हाे ।

 बैठकले नेपाल कानून आयोगको अध्यक्षमा पूर्व न्यायाधीश जागेश्वर सुवेदीलाई नियुक्त गर्नुका साथै यसैगरी, राष्ट्रिय योजना आयोगको सदस्यमा पुष्प रमन वाग्ले र सोलनी प्रधान सिंहलाई नियुक्त गर्ने निर्णय समेत गरेकाे छ ।

त्यस्तै बैठकले कोभिड–१९ विरुद्धको सारकोभ –२ एमआरएनए खोप तथा हैजाको खोपलाई नेपालमा क्लिनिकल ट्रायल गर्न अनुमति दिएको छ ।