विभिन्न स्थानबाट अवैध लागूऔषध सहित ५ जना पक्राउ

११ भदौ, काठमाडौं । विभिन्न स्थानबाट अवैध लागूऔषध सहित ५ जनालाई प्रहरीले पक्राउ गरेको छ । मकवानपुरको मनहरी गाउँपालिका-५ जय सिंङ्बाट करिब ४० किलो अवैध लागूऔषध गाँजा सहित २ जनालाई शुक्रबार बिहान प्रहरीले पक्राउ गरेको हाे ।

पक्राउ पर्नेहरुमा सोही गाउँपालिका-५ डिल्लीपुर बस्ने २४ वर्षीय राम चन्द्र मोक्तान र सोही ठाउँ बस्ने २२ वर्षीय अर्जुन लो रहेका छन् । सोही ठाउँस्थित सडकमा शंकास्पद रुपमा हिँडिरहेका उनीहरुलाई जिल्ला प्रहरी कार्यालय मकवानपुरबाट खटिएको प्रहरीले जाँच गर्ने क्रममा २ वटा बोरामा राखेको उक्त गाँजा सहित फेला पारी पक्राउ गरेको हो ।

यस्तै, मोरङको बेलबारी नगरपालिका-५ कसेनी बस्ने ६१ वर्षीय लब नारायण भन्ने राजनारायण माझीलाई करिब ४ किलो ५ सय ग्राम अवैध लागूऔषध गाँजा सहित बिहीबार साँझ प्रहरीले पक्राउ गरेको छ । उनको घरमा गाँजा बिक्री भइरहेको भन्ने खबर प्राप्त हुनासाथ प्रदेश प्रहरी कार्यालय विराटनगर र ईलाका प्रहरी कार्यालय बेलबारीवाट खटिएको प्रहरीले उक्त गाँजा सहित फेला पारी उनलाई पक्राउ गरेको हो ।

उता, कञ्चनपुरको भिमदत्त नगरपालिका-६ शान्तिटोल बस्ने २५ वर्षीय सागर चन्द र सोही ठाउँ बस्ने २८ वर्षीय उमेश साउदलाई २८ मिलिग्राम अवैध लागूऔषध खैरो हेरोइन जस्तो देखिने पदार्थ सहित बिहीबार राति प्रहरीले पक्राउ गरेको छ । शंका लागि प्रहरीले जाँच गर्ने क्रममा उक्त पदार्थ सहित फेला पारी उनलाई पक्राउ गरेको हो ।
यस सम्बन्धमा प्रहरीले थप अनुसन्धान गरिरहेको छ ।