नेपाली सेनाको प्रधानसेनापतिमा प्रभुराम शर्मा नियुक्त

११ भदौ, काठमाडौं । नेपाली सेनाका बलाधिकृत रथी प्रभुराम शर्मा प्रधानसेनापति नियुक्त भएका छन् । मन्त्रिपरिषदको सिफारिसमा राष्ट्रपति विद्यादेवी भण्डारीले नेपालको संविधानको धारा २६७ को उपधारा (५) बमोजिम शुक्रवार शर्मालाई प्रधानसेनापति पदमा नियुक्त गरेको राष्ट्रपति कार्यालयका सहायक प्रवक्ता केशवप्रसाद घिमिरेले जानकारी दिए ।

भदौ २ गते बिहीबार बसेको मन्त्रिपरिषदको बैठकले नेपाली सेनाका बलाधिकृत रथी शर्मालाई महारथी दर्जामा पदोन्नति गरी प्रधानसेनापति पदमा नियुक्त गर्न राष्ट्रपतिसमक्ष सिफारिस गर्ने निर्णय गरेको थियो ।

सैनिक ऐन, २०६३ को दफा ८ को उपदफा ‘३’ अनुसार मन्त्रीपरिषदको सिफारिसमा राष्ट्रपति भण्डारीले बलाधिकृत रथी शर्मालाई गत साउन १७ गते आइतबार कायम मुकायम प्रधानसेनापति नियुक्त गरेकी थिइन् ।

कायममुकायम प्रधान सेनापतिको कार्यभार सम्हाल्दै आएका शर्माको कार्यकाल भदौ २४ बाट सुरु हुनेछ ।