राष्ट्रिय स्तरका विकास बैंकहरुः पाँच परिसूचक दाजेर हेर्दा सबैभन्दा अब्बल कुन बैंक ?

१३ भाद्र, काठमाडौं । बैंक तथा वित्तीय संस्थाले गत वर्षको चौथो त्रैमासको वित्तीय विवरण सार्वजनिक गरेका छन् । जसमध्ये यतिबेला राष्ट्रिय स्तरका विकास बैंकले चौथो त्रैमासको वित्तीय विवरण प्रकासित गरेका छन् ।

हाल चौथो त्रैमासको वित्तीय विवरण सार्वजनिक गर्ने राष्ट्रिय स्तरका विकास बैंकले केही वाणिज्य बैंकको मुनाफा पछि पारेका छन् । जसअनुसार पछिल्लो समय शेयर बजारमा लगानीकर्ताहरुका लागि विकास बैंकहरु प्रमुख क्षेत्रका रुपमा देखिएका छन् ।

केही सातादेखि विकास बैंकहरुको शेयरको माग बढ्दो छ । गत आर्थिक वर्षको वित्तीय विवरण अनुसार राष्ट्रिय स्तरका ८ विकास बैंकले राम्रै प्रगति गरेका छन् । ८ वटै बैंकको प्रतिशेयर आम्दानीदेखि लाभांश दिने क्षमतामा वृद्धि भएको छ ।

गत आर्थिक वर्षको असार मसान्तसम्मको वित्तीय विवरण अनुसार ८ विकास बैंकहरुको प्रतिशेयर आम्दानी (ईपीएस), खराब खर्जा (एनपीएल), चुक्ता पूँजी, जगेडा कोष, बैंकको लाभांश क्षमताको बारेमा यहाँ प्रस्तुत गरिएको छ ।

चुक्ता पुँजीमा पनि मुक्तिनाथ अगाडि

बैंकहरुले सार्वजिनक गरेको गत आर्थिक वर्षको वित्तीय विवरण अनुसार सबैभन्दा बढी चुक्ता पुँजी हुने बैंक मुक्तिनाथ विकास बैंक देखिएको छ । यो बैंकको चुक्ता पूँजी ४ अर्ब ८१ करोड रुपैयाँ छ । ज्योति विकास बैंकको चुक्ता पुँजी ३ अर्ब ८४ करोड रुपैयाँ, गरिमा विकास बैंकको चुक्ता पूँजी ३ अर्ब ६७ करोड रुपैयाँ र महालक्ष्मी विकास बैंकको कुल चुक्ता पुँजी ३ अर्ब ३४ करोड रुपैयाँ देखिएको छ ।

यस्तै, साइन रेसुङ्गा बैंकको ३ अर्ब ४० करोड, कामनासेवा विकास बैंकको कुल चुक्ता पुँजी २ अर्ब ६५ करोड, लुम्बिनीको २ अर्ब ९० करोड र साँग्रिला विकास बैंकको २ अर्ब ७३ करोड रुपैयाँ चुक्ता पुँजी रहेको छ ।

ईपीएसमा कामना सेवा अगाडि

८ वटा राष्ट्रिय बैंकहरुमा सबैभन्दा बढी प्रतिसेयर आम्दानी (ईपीएस) हुने बैंकको सूचीमा कामना सेवा विकास बैंक देखिएको छ । कामना सेवा विकास बैंकको प्रतिसेयर आम्दानी (ईपीएस) २६.४० रुपैयाँ छ । यस्तै, दोस्रो बढी ईपीएस हुने बैंकको सूचीमा मुक्तिनाथ विकास बैंक रहेको छ । यो बैंकको ईपीएस २३.९२ रुपैयाँ छ ।

गरिमा विकास बैंकको २२.४५, ज्योति विकास बैंकको १९.२९, महालक्ष्मीको २१.९३, लुम्बिनीको १७.७६, साँग्रिलाको १५.२३ र साइन रेसुङ्गा बैंकको १५.१० रुपैयाँ ईपीएस रहेको छ ।

मुक्तिनाथको खराब कर्जा कम

सबैभन्दा कम खराब कर्जा (एनपीएल) हुने बैंकको सूचीमा मुक्तिनाथ विकास बैंक रहेको छ । मुक्तिनाथ विकास बैंकको एनपीएल ०.२५ प्रतिशत छ । सबैभन्दा बढी एनपीएल हुने विकास बैंक भने महालक्ष्मी विकास बैंक देखिएको छ । महालक्ष्मी विकास बैंकको एनपीएल ३.३२ प्रतिशत रहेको बैंकले सार्वजनिक गरेको वित्तीय विवरणले देखाएको छ ।

यस्तै, लम्बिनी विकास बैंकको एनपीएल २.१३ प्रतिशत, साँग्रिला विकास बैंकको १.४ प्रतिशत, कामना सेवाको १.५ प्रतिशत, साइन रेसुङ्गाको ०.९९, ज्योतिको ०.८० र गरिमा विकास बैंकको ०.७२ प्रतिशत एनपीएल देखिएको छ ।

लुम्बिनीको जगेडा बढी

राष्ट्रिय स्तरका ८ वटा विकास बैंकहरुको तुलनामा सबैभन्दा ठूलो जगेडा कोष लुम्बिनी विकास बैंकको देखिएको छ । लुम्बिनी विकास बैंकको जगेडा कोषमा १ अर्ब ९९ करोड रुपैयाँ रहेको छ । दोस्रो बढी जगेडा कोष हुने विकास बैंकको रुपमा महालक्ष्मी विकास बैंक रहेको छ । यो बैंकको जगेडा कोषमा १ अर्ब ५९ करोड रुपैयाँ छ ।

यस्तै, मुक्तिनाथ विकास बैंकको जगेडा कोषमा १ अर्ब १२ करोड, साइनरेसुङ्गाको १ अर्ब ३ करोड, गरिमाको १ अर्ब, ज्योति विकास बैंकको ८७ करोड, कामना सेवाको ८४ करोड र साँग्रिलाको ६७ करोड रुपैयाँ रहेको छ ।

लाभांश क्षमता कुन बैंकको राम्रो ?

सार्वजनिक भएका वित्तीय विवरण अनुसार सबैभन्दा बढी लाभांश दिन सक्ने बैंकका रुपमा मुक्तिनाथ विकास बैंक रहेको छ । ८ वटै विकास बैंकहरु मध्ये मुक्तिनाथ विकास बैंककाे लाभांश दिन सक्ने सबैभन्दा बढी रहेकाे छ ।