प्रधानमन्त्रीले दिए काठमाडौंका मेयरलाई फोहोर उठाउन निर्देशन

१४ भदौ, काठमाडौैं । प्रधानमन्त्री शेरबहादुर देउवाले काठमाडौंका मेयर विद्यासुन्दर शाक्यलाई काठमाडाैंमा थुप्रिएकाे फोहर जतिसक्दो छिटो उठाउन निर्देशन दिएका छन् । प्रधानमन्त्रीले आवश्यक व्यवस्थापन गरेर छिटाेभन्दा छिटाे काठमाडाैंका सडक, गल्ली र घरघरमा थुप्रिएकाे फाेहाेर उठाउने प्रबन्ध गर्न काठमाडौँ महानगरपालिकाका प्रमुख र उपप्रमुखलाई निर्देशन दिएका हुन् ।

काठमाडाैंका सार्वजनिक ठाउँमा फाेहाेर थुप्रिएर शहर दुर्गन्धित भएपछि उनले आज प्रधानमन्त्री निवास बालुबाटारमा कामपाका प्रमुख विद्यासुन्दर शाक्य र उपप्रमुख हरिप्रभा खड्गीलाई बोलाएका थिए । तत्काल फोहर उठाउन आवश्यक प्रबन्ध गर्न निर्देशन दिँदै प्रधानमन्त्री देउवाले त्यसमा नेपाल सरकारको तर्फबाट पूर्ण सहयोग हुने बताए ।

सम्बन्धित अन्य सरकारी निकायबाट पनि समन्वय हुने भन्दै उनले काठमाडौंको फोहर उठाउने व्यवस्था गर्न निर्देशन दिएको प्रधानमन्त्रीको सचिवालयले बताएको छ ।