सुदुरपश्चिममा नेकपा एस पार्टी सबैभन्दा ठूलो दल, बाग्मती र प्रदेश १ मा मूख्यमन्त्री ढाल्नसक्ने हैसियत

२२ भदौ, काठमाडौं । निर्वाचन आयोगले आज २२ गतेसम्म दल रोज्ने समय दिदा एमालेबाट विभाजित भएको नेकपा एकिकृत समाजवादी पार्टीलाई ५४ जना प्रदेश सभासदले रोजेका छन् । प्रदेशसभा सदस्य र स्थानीय जनप्रतिनीधिहरुले विभाजित दल रोज्न पाउने आज समय रहेका बेला हिजोसम्ममा नेकपा एमालेबाट निर्वाचित ५४ जना प्रदेश सभा सदस्यहरुले नेकपा एकिकृत समाजवादी रोजेका हुन् । सात प्रदेशमा एमालेबाट निर्वाचित २३३ प्रदेशसभा सदस्यमध्ये पूर्व प्रधानमन्त्री माधव नेपाललाई ५४ जनाले साथ दिएका छन् ।

माधव नेपाललाई संघीय संसदमा ३० जनाले मात्रै साथ दिएको बेला प्रदेश सभामा भने उनको पक्षमा उल्लेख्य रुपमा सहयोग गरेका छन् । एकिकृत समाजवादी पार्टी सुदुरपश्चिममा सबैभन्दा ठूलो दल भएको छ । नेपालले सुदुरपश्चिम, प्रदेश २, बाग्मतीमा धेरै सांसद लगेका छन् । सुदुरपश्चिम प्रदेशमा १४ जना सांसद पुगेपछि त्यहाँ सबैभन्दा ठूलो दल बनेको हो । गण्डकी प्रदेशमा माधव नेपालसँग एक जना पनि प्रदेश सांसद गएनन भने लुम्बिनीमा भने एक जनाले साथ दिएका छन् । बागमती र प्रदेश १ मा एमालेको सरकार ढाल्न प्रयाप्त संख्या बनाएको छ ।

पार्टी अध्यक्ष केपी शर्मा ओली र महासचिव इश्वर पोखरेलले एमालेमा १० बुँदे कार्यन्वयन गर्न आनाकानी गरेपछि सुदुरपश्चिम प्रदेशका धेरैजसो जनप्रतिनीधिहरुले एमाले छाडेका हुन् । माधव नेपाल छाडेर एमालेमै बसेका मध्यमार्गी धारका नेताका कारण एमाले प्रदेश १ र वागमतीमा ठूलो क्षतिबाट जोगिएको भएपनि सुदुरपश्चिममा भने त्यो क्षति कम भएन । भीम रावल समेत एक्लिएका छन् । प्रदेश १ मा एमालेका ५१ जना सांसद थिए । पार्टी विभाजनपछि नेकपा एसमा १० जना गएका छन् । भीम आचार्य र योगेश भट्टराई एमालेमै रहेका कारण ९ जना प्रदेशसभा सदस्य विभाजनको विपक्षमा उभिएका थिए । प्रदेश २ मा प्रदेशसभातर्फ एमालेलाई ठूलो क्षति भएको छ । माधव नेपालले नेतृत्व गरेको सो पार्टीमा १३ जना सांसद गएपछि एमालेमा ८ जनामात्र रहेका छन् ।

बागमती प्रदेशमा पार्टी विभाजनको असर देखिएको छ । अष्टलक्ष्मी शाक्यको सरकारलाई अल्पमतमा पारिसकेको भएपनि मूख्यमन्त्रीमा कांग्रेसले दावी गरेका कारण नेकपा एस पार्टी दोधारमा रहेको छ । ५६ जनामध्ये १३ जना प्रदेशसभा सदस्यले नेकपा एसलाई साथ दिएका छन् । काभ्रेका दुवै क्षेत्रका सांसदले गोकुल बाँस्कोटाको साथ छाडेका छन भने नेपाल पक्षको गढ रहेको सिन्धुपाल्चोकमा नेपाललाई घाटा लागेको छ । अष्टलक्ष्मी शाक्य, सुरेन्द्र पाण्डे, रघुजी पन्त, अरुण नेपाललगायतका नेता एमालेमै रहँदा सिन्धुपाल्चोक, रामेछाप, नुवाकोट, काठमाडौं, ललितपुर, सिन्धुलीलगायतका जिल्लाका नेताहरु पार्टी विभाजनको विपक्षमा रहेका छन् ।

गण्डकी प्रदेशसभामा २७ जना सांसद रहेको एमालेमै रहेका छन् । नेकपा एमालेका सबैभन्दा धेरै स्थायी कमिटी सदस्य रहेको लुम्बिनीमा घनश्याम भुसाल, गोकर्ण विष्ट, युवराज ज्ञवालीलगायतका नेता एमालेमै बसेपछि धेरै जनप्रतिनिधि र नेता कार्यकर्ताले एमालेमै रहने भएका छन् । कर्णालीमा प्रकाश ज्वाला लगायतका ४ जनाले यसअघि नै फ्लोर क्रस गरेर सांसद पद गुमाइसकेका छन् ।

थप तीनजनाले विभाजनको पक्षमा उभिएका कारण एमालेको सांसद संख्या १३ मात्रै रहेको छ । एमालेका २५ जना प्रदेशसभा सदस्यमध्ये १४ जनाले नेकपा एस रोजेका छन् । संघीय संसदका ७ जना लिएर ओली छाडेका आलेले प्रदेशसभामा पनि नेकपा एसलाई एमालेभन्दा ठूलो बनाउन कम्तीमा ४ सांसद थपेका छन् । निर्वाचन आयोगले दिएको समयसीमा अनुसार नेकपा एमाले र जनता समाजवादी पार्टी छाड्ने प्रदेश सांसद र स्थानीय तहका जनप्रतिनिधिले आज एकीकृत समाजवादी र लोकतान्त्रिक समाजवादी पार्टी रोजी सक्नु पर्नेछ ।