काठमाडौंको सीडीओमा रिजाल, पराजुली गृह मन्त्रालय तानिए

२२ भदौ, काठमाडौं । काठमाडौंको प्रमुख जिल्ला अधिकारी (सीडीओ) को जिम्मेवारी गोविन्दप्रसाद रिजालले पाएका छन् । गृह मन्त्रालयको प्रशासन महाशाखाका सहसचिव रहेका रिजाललाई मंगलबार काठमाडौं जिल्लाको सीडीओको जिम्मेवारी दिइएको हो ।

यसअघि सीडीओ रहेका कालीप्रसाद पराजुलीलाई गृह मन्त्रालय तानिएको छ । मन्त्रालयमा हाजिर भएपछि पराजुलीको शाखा तोकिनेछ ।एक बर्ष नपुग्दै उनलाई मन्त्रालय तानिएको हो ।

पराजुलीसँग बालुवाटार र गृहमन्त्रालय रुष्ट रहेको बताइन्छ । केही समय अघि माधवकुमार नेपालले नयाँ पार्टी बनाउने प्रक्रियामा चन्द्रागिरी रिसोर्टमा केन्द्रीय सदस्यहरुको भेला राखेका थिए ।

सीडीओ पराजुलीले महामारीको बेला भीड जम्मा गरेको भन्दै रिसोर्टलाई स्पष्टिकरण सोधेका थिए । सो कुराको उजुरी रिर्सोटले बालुवाटारदेखि सम्बद्ध पार्टी नेतालाई गराएको थियो । तत्कालीन केपी शर्मा ओली नेतृत्वको सरकारले पराजुलीलाई काठमाडौंको प्रमुख जिल्ला अधिकारीको जिम्मेवारी दिएको थियो ।