एशियन लाईफको नयाँ बीमा योजना बजारमा

५ असाेज, काठमाडाैं । एशियन लाईफ इन्स्योरेन्स कम्पनी लिमिटेडले “सुनिश्चित आय (परिवार आय लाभ) जीवन बीमा योजना” नामक नयाँ बीमा योजना सार्वजनिक गरेको छ । ग्राहक बर्गहरुको रुचीलाई मध्यनजर गरी यस कम्पनीले नयाँ जीवन बीमा योजना सार्वजनिक गरेको प्रमुख कार्यकारी अधिकृत दिनेश लाल श्रेष्ठले बताए ।

यस बीमा योजनाको मूख्य बिशेषता भनेको परिवारको एकजना अभिभावकको आम्दानीमा निर्भर रहने कुराको अन्त्य गर्नु हो । परिवारको भविष्यमा आइपर्न सक्ने पैसाको खाँचोलाई सहजरुपमा व्यवस्थापन गर्ने उद्देश्यले यस्तो योजना संचालनमा ल्याएको कम्पनीको दावी छ ।

मुनाफामा सरिक नहुने यस जीवन बीमा योजनामा बीमितले अतिरिक्त बीमाशुल्क भुक्तानी गरेर अतिरिक्त लाभहरु जस्तैः दुर्घटना मृत्यु लाभ (ADB), स्थायी अपाङ्ग/अशक्त सुविधा (PTD) र बीमाशुल्क छुट सुबिधा (PWB) थप गर्न सकिने व्यवस्था रहेको छ ।

१८ वर्षदेखि ५३ वर्ष उमेर सम्मको व्यक्तिले सहभागी हुनसक्ने यो जीवन बीमा योजनाको अवधि २४ वर्षसम्म भएतापनि बीमितले शुरुको १२ वर्षसम्म मात्र बीमाशुल्क भुक्तानी गर्नुपर्छ । न्यूनतम वार्षिक बीमाशुल्क रु.२५,००० देखि माथि बीमितको आर्थिक अवस्थाको आधारमा जति सुकै रकमको बीमाशुल्क भुक्तानि गरी बीमा गर्न सकिनेछ ।

यस कम्पनीको चुक्ता पुँजी रु.२ अर्व भन्दा माथि रहेको छ । कम्पनीको जीवन बीमा कोष २६ अर्व ४८ करोड भन्दा बढी रहेको छ । साथै यस कम्पनीले ४२ वटा शाखा र १०६ वटा उपशाखा मार्फत सेवाग्राहीहरुलाई बीमा सेवा प्रदान गर्दै आईरहेको छ भने ग्राहक वर्गहरुको चाहनालाई ध्यानमा राख्दै भविष्यमा अन्य बीमा योजनाहरु समेत ल्याउने योजना रहेको छ । हाल सम्म कम्पनीले २३ वटा बीमालेखहरु बिक्रिमा ल्याईसकेको जनाएको छ ।

कम्पनीका संचालक समितिका अध्यक्ष दिपक कुमार श्रेष्ठ, कम्पनीका संचालकहरु सुरेन्द्र कुमार गोयल, सजल मास्के, निष्ठा प्रधानाङ्ग, अच्यूत राज सापकोटा, कम्पनीका प्रमुख कार्यकारी अधिकृत दिनेश लाल श्रेष्ठ, नायब प्रमुख कार्यकारी अधिकृत होम बहादुर श्रेष्ठ, का.मु. नायब प्रमुख कार्यकारी अधिकृत मुरारी राज हुमागाईं लगायतको उपस्थितिमा कम्पनीको प्रधान कार्यालयमा कार्यक्रम आयोजना गरी आज उक्त जीवन बीमा योजना सार्वजनिक गरीएको जानकारी दिइएको छ ।