जुम्लामा १८ वर्षमाथिका ४१ हजारलाई कोरोना खोप लगाइने

दिलमाया शाही

६ असोज, जुम्ला । जुम्लाका १८ वर्षभन्दा माथिका ४१ हजार नागरिकलाई कोरोना विरुद्धको खोप लगाइने भएको छ । यहीँ ९ असोजबाट १८ वर्ष माथिका ४१ हजार ६७६ जनालाई तत्काल खोप लगाइने भएको हो ।

जुम्लाको कुल जनसंख्याको ३३ प्रतिशतलाई खोप लगाउने सरकारको निर्देशनअनुसार १८ वर्ष माथिका ४१ हजार बढीलाई खोप लगाउने तयारी भएको जनस्वास्थ्य सेवा कार्यालय प्रमुख कृष्ण सापकोटाले बताए । उनकाअनुसार पहिलो खोप लगाएकालाई दोस्रो डोज र खोप नै नलगाएकालाई पहिलो डोज लगाइने छ ।

आवश्यकताका आधारमा स्वास्थ्यकर्मी, स्वयमसेविका, शिक्षक युवालाई परिचालन गरिने छ । यहाँका ८ वटा स्थानीय तहमा दुई चरणमा खोप लगाइने छ । तालिम प्राप्त स्वास्थ्यकर्मीसहित ५ सय ४७ जना स्वयम् सेविका परिचालन हुने छन् । प्रत्येक पालिकामा खोप केन्द्र राखिँदै छ । खलंगामा बस्नेको हकमा प्रतिष्ठानलाई खोप केन्द्र तोकिने छ ।

जिल्लाभरीका कर्णाली प्रतिष्ठान र ३० स्वास्थ्य चौकीसहित ३२ खोप केन्द्रबाट खोप दिइने छ । प्रत्येक पालिकाको एक स्वास्थ्य चौकीलाई व्यवस्थापन केन्द्रका रुपमा तोकिने स्वास्थ्य कार्यालयले जनाएको छ ।

कार्यालयका अनुसार हाल जुम्लामा ४१ हजार ७ सय ४० डोज खोप आइपुगेको छ । खोपको उचित भण्डारण गरिएको छ । जिल्लामा २४ हजार ६ सय ४८ जनाले खोप लगाइसकेका छन् । १९ हजार ८४७ जनालाई पूर्ण खोप अर्थात दोस्रो डोजसमेत लगाइसकेका छन् ।

प्रमुख जिल्ला अधिकारी विजया कुमारी प्रसाईले सबै नागरिकलाई खोपको पहुँचमा पुर्‍याउने सरकारको लक्ष्य सफल पार्न सबै नागरिकलाई खोप लगाउन आग्रह गरेकी छन् ।