एन्टिजेन परीक्षणकाे शुल्क बढी लिने सुमेरु हस्पिटल कारबाहीमा

१० असोज, काठमाडौं । कोरोना भाइरस संक्रमण पत्ता ल‍गाउन सुरु गरेको एन्टिजेन परीक्षणमा तोकिएभन्दा बढी शुल्क लिने ललितपुरस्थित सुमेरु अस्पताल कारबाही पर‍ेकाे छ ।

पुल्चोकस्थित सुमेरु सिटी हस्पिटलले एन्टिजेन परीक्षणका क्रममा सेवाग्राहीसँग बढी शुल्क लिएको पाइएपछि ३० हजार रुपैयाँ जरिवाना तिराइएको हो ।

सेवाग्राहीको उजुरीको आधारमा संयुक्त बजार अनुगमन टोलीले आइन्दा तोकिएको दररेटभन्दा बढी शुल्क नलिने शर्तमा अस्पताललाई एक पटकका लागि चेतावनी दिएर छाडेको छ ।

सरकारले एन्टिजेन परीक्षणको शुल्क १ हजार रुपैयाँ तोकेको छ । तर सुमेरु लगायत अस्पतालले एन्टिजेन परीक्षण गर्न आउने बिरामीसँग २ हजार ५ सय रुपैयाँसम्म लिदै आइरहेका छन् ।

जसले गर्दा आमनागरिक समस्यामा छन् । कोरोनासँग मिल्दोजुल्दो लक्षण देखिए पनि सरकारी अस्पतालमा समयमा परिक्षणको पालो नआउनु र निजिले तोकिएभन्दा बढी शुल्क लिनुले नागरिकहरु समस्यामा परेका हुन् ।