सुदूरपश्चिममा थप १५ जनामा कोरोना पुष्टि

१७ असोज, सुदूरपश्चिम । सुदूरपश्चिम प्रदेशमा १५ जनामा कोरोना भाइरसको संक्रमण पुष्टि भएको छ । चौबीस घण्टामा एक हजार ५७० को नमूना परीक्षण गरिएको थियो । प्रदेशमा हाल सक्रिय संक्रमित ३५३ छन् ।

कोरोना भाइरस फैलिएयता हालसम्म प्रदेशमा एन्टिजेन परीक्षण एक लाख ४५ हजार २७५ र पीसीआर परीक्षण दुई लाख छ हजार ९५४ समेत जम्मा तीन लाख ५२ हजार २२९ जनाको नमूना परीक्षण भइसकेको छ । नमूना परीक्षण भएकामध्ये ४७ हजार २९८ जनामा कोरोनाको संक्रमण देखिएको छ ।

संक्रमित हुनेमध्ये हालसम्म ४६ हजार ५९८ जना संक्रमणमुक्त भएका छन् । पाँच सय ९७ संक्रमितको मृत्यु भएको छ । स्वाथ्य निर्देशनालयका निर्देशक डा गुणराज अवस्थीले अवस्था जटिल बनेपछि मात्र संक्रमितलाई अस्पताल पु¥याउने वा संक्रमित व्यक्तिमा कुनै दीर्घ रोगी भएर नै मृत्युदर बढेको हुनसक्ने बताए ।

पछिल्लो एक हप्तामा उपचाररत पाँच संक्रमितको उपचारका क्रममा मृत्यु भएको निर्देशनालयले जनाएको छ । अघिल्लो हप्ता मृत्युदर योभन्दा कम थियो । पछिल्लो हप्तामा २०० संक्रमित थपिँदा २५५ जना संक्रमणमुक्त भएका छन् ।

गएको २४ घण्टामा डडेलधुरा जिल्लाका ७० वर्षीय एक पुरुषको डडेलधुरा अस्पतालमा उपचारका क्रममा मृत्यु भएको छ । गएको शुक्रबार मात्रै कैलाली जिल्लाका ९० वर्षीय र ७० वर्षीय गरी दुई पुरुष संक्रमितको सेती प्रादेशिक अस्पताल धनगढीमा उपचारका क्रममा मृत्यु भएको थियो ।