दशैंमा स्वास्थ्यको पनि ध्यान दिने कि ?

आज बडादशैंको दोस्रो दिन । आज पनि मान्यजनका हातबाट दशैंको टीका र जमरा लगाइँदैछ । नवदुर्गाको प्रसादका रुपमा रातो टीका र समृद्धिको प्रतिकका रुपमा पहेँलो जमरा लगाएर आशिष लिने दिने परम्परा अनुसार कोजाग्रत पूर्णिमासम्म टीका लगाउने चलन छ ।

विजयादशमीमा टीका लगाउन नभ्याएका तथा टाढा रहेका आफन्त तथा मान्यजन कहाँ आज दोस्रो दिन पनि टीका लगाइँदैछ । बडादशैंमा यसवर्ष कोरोना संक्रमण जोखिम कायमै रहे पनि गत वर्षभन्दा चहलपहल बढेको छ ।

खोप लगाउनेको संख्या बढ्दै गएको तथा संक्रमण पनि घट्दै गएपछि सरकारले यसपटक दशैंलगायतका चाडबाडमा विगतमा जस्तो कडिकडाउ गरेको छैन । अहिले शहरदेखि गाउँसम्म दशैंको रौनक छाएको छ ।

कोरोना भाइरसको जोखिम अझै पनि त्यस्तै छ, लकडाउन या सटडाउन जे नाम दिइए पनि आम नेपालीको जनजीवन तेति सोचे जस्तो छैनन । मुलुकका आर्थिक गतिविधिहरु प्रायः ठप्प छन् भने ज्याला मजदुरी गरेर दुई छाकको जोहो गर्नेहरुको दैनिक अझ बढी दयनीय छ । यो वास्तविकतासँग सरकार पनि जानकार नै छ ।

संक्रमणका बीच पनि दशैंको किनमेल गर्ने, उपत्यकाबाट बाहिरिनेहरुको चाप त्यतिकै छ । ठाउँठाउँमा दशैं बजार खुल्ने तयारी त कतै कतै चहलपहल अलि केही कम मात्रमा भइरहेका छन् । तर, अब दशैं मनाइरदा हामीले हाम्रो स्वास्थ्यको पनि गम्भीरतापूर्वक सोच्नु आवश्यक छ । किनकी दशैंको माहौलमा हामीहरु रमाईरहँदा कोरोना भाइरस नियन्त्रणबाहिर नजाओस् ।

टाढा–टाढा परदेशमा रहेकाहरु पनि घर फर्किने चाडका रुपमा रहेको दशैंमा अग्रजले दिएको आशिर्वाद शिरोधार्य गरी कर्म क्षेत्रमा लाग्ने सत्प्रेरणा ग्रहणको अवसर पनि रहने गरेको छ । दुर्गा भवानीको पूजा अर्चना तथा गाउँघरमा लाग्ने मेलाले बातावरण नै रोमाञ्चित तुल्याउने गर्छ ।

खर्च गर्ने क्षमता नभएकाहरुकालागि पनि दशैं वर्ष दिनमा एक पल्ट भएपनि मीठो खाने र राम्रो लाउने अवसरको रुपमा लिने गर्दछन । यही कहरका कारणले कतिको ज्यानै गएको छ भने हज्जारौं अहिले संक्रमित भई उपचारका क्रममा रहेका छन् । यस्तो त्रासदीका बीच आएको बडादशैंले मानव मनमा उत्साह भर्न नसकिरहेको अवस्था सहजै अनुमान गर्न सकिन्छ ।

चाडपर्व मनाउने भन्दा पनि पहिला यस्तो महामारीबाट कसरी सुरक्षित रहन सकिन्छ भन्नेतिर लाग्नु नै अहिलेको मूल आवश्यकता बनेको छ । चाडपर्व फेरि पनि मनाईएला तर, त्यस अघि पहिले त जीउ ज्यानको सुरक्षा नै पहिलो प्राथमिकताको विषय हो । दशैंको यस माहौलमा भिडभाडबाट अलग रहने, सामाजिक दूरी कायम राख्ने, संक्रमण रोक्नकालागि आवश्यक सबै स्वास्थ्य मापदण्डको पालना गर्नेतिर बढी जोड दिन जरुरी छ ।

प्रत्यक्ष भेटघाट भन्दा पनि भर्चुअल रुपबाटै भएपनि सद्भाव र शुभकामनाको साटासाट गरौं । आगामी वर्षको बडादशैं विगतको जस्तै महामारीबाट मुक्त भई उन्मुक्त बातावरणमा हर्षोल्लासका साथ मनाउन पाईयोस् । सबैमा विजयादशमीको मंगलमय शुभकामना ।